![teeth](https://panacea.mk/wp-content/uploads/2018/01/teeth-696x364.jpg)
Ги четкате забите два пати дневно, правите редовни прегледи на стоматолог неколку пати во годината, се откажавте и од пушењето, но забите се уште ви се жолти? Ако не сте знаеле, постојат одредени намирници и пијалаци кои може да влијаат на бојата на забите.
Многумина не можат да го замислат почетокот на денот без миризлива чаша топло кафе, но пиејќи го овој пијалак ретко кој може да се сети дека кафето може да остави дамки на забите и да ја уништи и најубавата насмевка.
Покрај омиленото кафе, постојат уште пијалаци и намирници кои треба да ги одбегнувате доколку сакате да ја задржите белината на забите
Вино
Сите знаеме дека црвените вина содржат танин, пигмент кој влијае на промена на бојата на забите. Ако мислите дека ќе го избегнете проблемот пиејќи чаша бело вино, тогаш се лажете. И белото вино, исто така, може да предизвика промени, па затоа користете го овој алкохолен пијалак умерено.
Лимонада
Пијалакот по кој сите посегнуваме во лето, а и секогаш кога сакаме да се освежиме, е комбинација од киселина и шеќер, која сигурно ќе влијае на влошување на глеѓта, вели Ненси Росен, стоматолог од Њујорк.
Кари
Овој зачин има интензивна жолта боја која се задржува и на забите. Препораката е да ги измиете забите веднаш по консумирањето.
Енергетски пијалаци
Во списанието „General Dentistry“ се објавени резултатите од истражувањето каде се барала врската помеѓу спортските пијалаци и оштетувањето на забите. Научниците предупредуваат на алармантен пораст на потрошувачката на спортски и енергетски пијалоци кои предизвикуваат непоправлива штета на нашите заби. Овие пијалаци се многу кисели и можат да го оштетат забниот емајл и на тој начин да влијаат на промената на бојата на забите.
Цвекло
Овој зеленчук е екстремно хранлив и богат со влакна, но неговата црвена боја е тешко да се отстрани од забниот емајл. По консумирањето веднаш измијте ги забите!
Сос од домати
Забниот емајл е осетлив на темни бои, а особено на сос од домати. Киселината од доматите предизвикува „отворање“ на порите на забите, а таквиот емајл е склон кон апсорбирање на бојата и ги прави забите жолти.