“Навистина можете многу да дознаете за нечие здравје само ако ги погледнете неговите раце. Секако, ако сте загрижени или имате постојани симптоми, треба да го контактирате вашиот матичен лекар“, објаснува ревматологот Кели Везелман, шеф за комуникации на Американскиот Универзитет за ревматологија.
Со оглед на тоа што повеќето луѓе не знаат да ги препознаат предупредувачките знаци, медицинските експерти ги споделија вообичаените, но и по малку чудните работи што ги бараат кога ги прегледуваат рацете и што би можеле да значат тие симптоми.
ПОСЛАБ СТИСОК НА РАЦЕТЕ
Никој не сака слаб стисок на рацете кај лице со кое се ракува, но понекогаш може да биде знак за влошување на здравјето.
“За време на физичкиот преглед на пациентите секако внимаваме на нивниот стисок на рацете, бидејќи во повеќето случаи слабиот стисок може да укаже на проблеми со срцето“, објаснува кардиологот Ен Алберс.
Имено, слабиот стисок на раката заедно со бавното одење може да биде знак за зголемен ризик од срцеви заболувања, покажало истражување од 2016 година, чии резултати се објавени во списанието International Journal of Cardiology.
Една неодамнешна студија на возрасни лица помеѓу 40 и 69 години открило дека поцврстиот стисок на рацете може да значи дека срцето работи добро. Надоврзувајќи се на овие наоди, истражувачите мислат дека стисокот на дланките сигурно има потенцијал да ги идентификува луѓето со висок ризик од развој на срцеви заболувања.
ЦРВЕНИ МЕУРЧИЊА ИЛИ МОЗОЛЧИЊА
Дали некогаш сте се запрашале што значи мистериозниот црвен осип на вашата рака или зглоб? Ова, предупредуваат лекарите, може да биде алергија на никел, особено ако испакнатините се претворат во плускавци што истекуваат. Имено, чувствителноста на никел е всушност една од најчестите причини за алергиски контактен дерматитис, пренесува Американската академија за дерматологија.
“Нашите раце доаѓаат во контакт со многу предмети што содржат никел како нараквици, прстени, часовници, дури и мобилни телефони. Но, исто така може да развиете осип на рацете од јадење храна што го содржи. Посебно го има во грав, чоколадо, кикиритки, соја, овесни снегулки и гранола“, објаснува Салма Фагри де ла Фелд, доцент на катедрата за дерматологија на Универзитетот Емори во Атланта.
ТРНЕЊЕ ИЛИ ЧУВСТВО НА СЛАБОСТ
Сите одвреме-навреме чувствуваме трнки во рацете, а ако сте млади и релативно здрави, веројатно се работи за синдром на карпален тунел, предупредуваат експертите. Имено, многу луѓе навечер чувствуваат трнење бидејќи спијат со свиткани зглобови. Ова потоа го компримира средниот нерв што се протега од зглобот до раката, објаснува Американската академија на ортопедски хирурзи.
Ако вашиот лекар се посомнева дека имате карпален тунел, може да побара ЕМГ (електромиограм) за да се открие дали има оштетување на нервите или мускулите. Д-р Метју Барет, професор по неврологија на Универзитетот Вирџинија, вели дека третманите на карпален тунел варираат во зависност од тежината на симптомите.
“Кај кој било изненадна појава на трнење или чувство на слабост во рацете или дланките треба веднаш да се реагира бидејќи постои ризик од можен мозочен удар“, додава д-р Барет.
ТРЕСЕЊЕ НА РАЦЕТЕ
Треперењето на рацете не мора секогаш да биде причина за загриженост, но може да сигнализира и за некоја невролошка болест. Важно е да се препознае разликата помеѓу сомнителниот тремор и оној што речиси секој човек го има повремено при извршување на прецизна или напорна работа. Оваа појава е позната и како физиолошки тремор и не е причина за тревога.
Д-р Барет вели дека тресењето или треперењето на рацете може да стане повоочливо кога пиете премногу кофеин, не спиете доволно, земате одредени лекови или сте во фаза на откажување од алкохол. Сепак, предупредува дека постои уште еден вид тремор што често се јавува во семејствата, а се нарекува есенцијален тремор. Ова предизвикува треперење во дланката и раката од двете страни од телото и е видливо при извршување на некоја работа, како на пример јадење.
Во некои случаи, треперењето на рацете е знак за Паркинсонова болест. Обично ја зафаќа само едната рака и се јавува кога раката е во мирување.
“Во комбинација со забавени движења и вкочанетост на екстремитетите зафатени со тремор, ова може да укажува дека се работи за Паркинсонова болест“, објаснува д-р Барет и додава дека треба да се побара помош од лекар кога тресењето се влошува со текот на времето или значително влијае на извршувањето на вашите секојдневни активности.
