Ф’стаците се богати со антиоксиданти, како и со витамини од Б-комплексот и минерали како што се калиум, магнезиум, железо, бакар и манган. Содржат и л-аргинин кој артериите ги прави поеластични и го намалува ризикот од формирање крвни згрутчувања. Помагаат и во регулирањето на нивото на ЛДЛ холестеролот – во една студија, 28 испитаници со покачено ниво на холестерол, кои инаку биле со добро здравје, јаделе по два пати на ден суво печени несолени ф’стаци (по 30 грама).
После еден месец кај испитаниците дошло до намалување на нивоата на ЛДЛ холестерол за 12 отсто. Бидејќи покаченото ниво на ЛДЛ холестерол претставува сериозен фактор ризик за создавање коронарни болести на срцето, ф’стаците на овој начин можат да помогнат во превенција од кардиоваскуларни болести.
Исто така, помагаат во контрола на телесната тежина, со оглед на тоа дека благодарение на здравите масти, протеини и влакна ја продолжуваат ситоста меѓу оброците. Одлични се и за видот – ф’стаците содржат каротеноиди лутеин и зеаксантин кои помагаат во превенцијата на старосна макуларна дегенерација и катаракта.
