Во земјава, во скромна форма почна вакцинацијата против КОВИД-19. Сите се надеваме вакцината ќе донесе спас и враќање на нашите животи во нормала. Сепак, дури и оние кои прележале КОВИД-19, исто како и оние кои се вакцинирани, не треба да престанат да носат заштитни маски, препорачуваат стручњаците.
“Уште некое време ќе мора да носиме маски и да одржуваме физичка дистанца. За жал, вакцинацијата не значи дека животот веднаш ќе ни се врати со состојба како пред пандемијата. Додека не постигнеме одредено ниво на имунизација, вакцината е само еден вид на заштита“, објаснуваат експертите за заразни болести.
Ова се пет причини што ги наведуваат експертите зошто треба да продолжиме да носиме маски, дури и откако ќе се вакцинираме.
За колективен имунитет потребно е да се вакцинира 50 до 80 проценти од населението, а дотогаш ни останува да се придржуваме до пропишаните епидемиолошки мерки, од кои носењето маска е наједноставната задача во која треба да истраеме за да се избориме против вирусот.
ПЕТ ПРИЧИНИ ПОРАДИ КОИ МОРА ДА ПРОДОЛЖИМЕ ДА НОСИМЕ МАСКИ
Вакцината доаѓа во две дози. Иако уште по првата почнува да се создава имунитет, да се постигне заштита од 90 проценти, колку што ориентационо нуди вакцината, треба да помине некое време. Во тој период и натаму може да се заразиме и треба и поради себе и поради другите, да носиме заштитна маска.
Дури и откако ќе помине потребниот период и кога ќе се постигне целосната заштита што ја нуди вакцината, таа не е стопроцентна. Иако шансите да се заразите се далеку помали, тие сепак постојат и треба да бидете претпазливи, а основниот начин и натаму е маската.
Вакцината спречува потешки форми на болеста, но ова се нови научни достигнувања, па затоа се потребни уште истражувања за да се знае дали е сепак можно да дојде зараза. Со други зборови, вакцинираните лица можат да бидат асимптоматски носители на вирусот, стравуваат експертите. Во овој случај, тие можат да го пренесат вирусот на други луѓе без да се свесни за тоа. Затоа, вакцинираните лица и понатаму треба да носат маска за да се намали циркулацијата на вирусот во заедницата.
Мал дел од луѓето не можат да се вакцинираат и на нив треба посебно да се внимава, како и на хронично болните и постарите лица кои можат да имаат потешки последици од инфекцијата. Одговорно е, дури и ако имаме стекнато имунитет, да мислиме на оние кои го немаат.
