Изминативе две години во земјава направени се 6 транспантации на срце, пресадени се 17 бубрези, 4 трансплантации на коскени ткива и 35 трансплантации на коскена срцевина од несроден дарител, што според здравствени власти е направен сериозен исчекор во трансплантацијата.
Со овие бројки, денес беше одбележан Европскиот ден на органодонорството кој им е посветуваме на сите семејства кои донираа органи од своите блиски, како и на донаторите на коскена срцевина.
“Во 2019 година направивме измени во Програмата за трансплантација. Се ажурираа листите на пациенти на коишто им беа потребни органи, срце бубрези и црн дроб како и коскени ткива. Паралелно на сето тоа направивме зајакнување на електорнскиот систем, ажурирање на електронските листи и за првпат воведовме електронски регистар кој што по систем на приоритизација врз основа на соодветни критериуми дава приоритет на пациентите кои што треба да ги добијат органите. Во екот на кризата со ковид во мај минатата година испишавме историја во македонската кардиохирургија и ја направиме првата трансплантација на срце во нашата земја“, изјави министерот за здравство Венко Филипче, на денешното одбележување на овој ден.
Според д-р Маја Мојсова Мијовска, национален координатор за трансплантација на почетокот на оваа година отворена е банка за органи и коскени ткива на Клиниката за ортопедија, што е многу значен дел во целосниот понатамошен процес на органодарителството.
“Се подготвуваме од идната година да почнеме и со пресадување на бубрези кај деца, како и трансплантација на црн дроб. Секако, сакам да потеницрам дека ако ги немаме семејствата со благородна душа кој знаат што е безгранична љубов и во најтешките моменти подарија некому живот, сето ова нема да се случи. Тие се наша најголема кампања и нивниот глас допира до сите. Тие се наши партнери во она што сакаме да го направиме. Сите сме едно семејство во исчекор на благородноста и љубовта за живот. Благодарение на вашата човечка дименизија пациентите добија можност да живеат и за тоа од срце ви благодарам“, изјави д-р Мојсова Мијовска.
“Трансплантацијата е огромен напредок во современата медицина. Донацијата на човечки органи врвна хуманост. Желбата за спасување животи е цивилизациска придобивка. На семејствата кои губат близок и во моментите на огромна тага носат одлука за донирање на нивните органи треба да им се поклониме и да им се заблагодариме. Нивниот чин спасува човечки живот и испраќа порака да го следиме нивниот пример“, истакна д-р Ирина Пановска Ставрдис, директор на Клиниката за хематологија, која има статус на регионален центар за хематолошки заболувања и трансплантација на коскена срцевина, со што пациентите за вакви сложени интервенции повеќе немора да се испраќаат во странство.
