Факти за менингоенцефалитисот пренесен од крлеж

Поретко болеста напредува до воспаление на мозокот-енцефалитис, кој се манифестира со поспаност, вртоглавица, треперење, пореметување на свеста и говорот и оштетување на мозочните нерви

Постојат три субтипови на менингоенцефалитис пренесен од крлеж: средноевропски тип, далечноисточен тип и сибирски тип на болеста. Инкубацијата на болеста најчесто трае од седум до 14 дена, а болеста се развива во две фази.

Првата фаза се појавува кај две третини од заразените лица и тоа е фаза во која вирусот се намножува локално во клетките на кожата, па се движи кон локалните лимфни јазли и од тука се шири низ крвотокот. Оваа фаза трае од еден до осум денови и се манифестира со симптоми како грип, замор, висока температура, главоболка, мачнина, повраќање, болки во мускулите.

Кај помал број заболени болеста прогресира во втората фаза, кај која се јавува нагло висока температура и знаци на зафатеност на нервниот систем, односно воспеление на мозочните обвивки-менингитис како што се силна главоболка, мачнина, повраќање, кочење на вратот и фотофобија.

Поретко болеста напредува до воспаление на мозокот-енцефалитис, кој се манифестира со поспаност, вртоглавица, треперење, пореметување на свеста и говорот и оштетување на мозочните нерви.

Лечењето на менингоенцефалитисот се спроведува во болница. Не постојат специфични антивирусни лекови за лекување на менингоенцефалитисот пренесен од крлеж, но тој може успешно да се спречи со вакцинирање. Најдобро е вакцина да се прими во текот на зимата, и подготвено да се дочека пролетта, кога е времето на крлежите.