Доматот (Solanum lycopersicum) е најпознатата и најконсумираната билка на нашите простори. Често луѓето сметаат дека доматот е зеленчук, меѓутоа тој е овошје. Богат извор е на витамин Ц, Б витамини, витамин Е, лутеин, зеаксантин, содржи натриум, калиум, магнезиум, калциум и железо. Состојката која го прави доматот лек е ликопенот кој има антиоксидантно дејство од сите каротеноиди кои се присутни во другите намирници, два пати е појак од бета-каротенот и 10 пати појак од алфа-токоферолот (витамин Е) во неутрализирањето на слободните радикали. Се смета дека суровиот, свеж домат нема никакво делување бидејќи ликопенот тешко се апсорбира, додека пак сварениот или термички одбработен домат и натопен во масло (најчесто маслиново масло) има лековито делување.
Зошто треба да се консумира?
- Одличен е во борбата против кардиоваскуларните заболувања, го зајакнува имунитетот и го штити организмот од инфекции и настинки.
- Црвената боја на доматот потекнува од ликопенот, кој е всушност каротеноид со особено антиоксидантно дејство, што исклучително ефикасно влијае на кожата.
- Доматот содржи малку калории, па затоа се препорачува на лицата со прекумерна телесна тежина.
- Свежиот сок од домати ја намалува тромбоцитната агрегација, па на тој начин спречува појава на тромбоза, особено кај лицата со дијабетес тип 2.
- Доматот го намалува нивото на лош холестерол, а со самото тоа ја намалува и опасноста од негово таложење на крвните садови.
- Го поттикнува создавањето на црвените крвни клетки и правилната функција на панкреасот, поради што е особено корисен за лицата со дијабетес.
