Покрај лековите кои се користат како дел од редовните терапии, во секој дом постои и корнер со лекови за самолекување на помали здравствени проблеми и симптоми, како што се помали исеченици, повреди, покачена телесна температура, главоболка, болка во грлото, кашлица, затнат нос и слично.
Добро е во домот да се има производи кои се користат за симптоматско лекување на настинка, значи лекови против болка и за намалување на телесната температура.
Важно е да се води сметка за тоа да се набавуваат исклучиво лекови кои се одобрени од соодветните институции, кои се проверени, ефикасни и безбедни, да се користат според упатствата, правилно да се чуваат и редовно да им се проверува рокот на траење.
Освен тоа, кај некои лекови е многу важно да се води сметка и за условите во кои се чуваат, како и за рокот на употреба откако ќе се отвори лекот, што вообичаено е наведено на амбалажата, што посебно важи за капките за очи, некои билни сирупи, пробиотици и слично.
Според предупредувањата на фармацевтите, важно е кога се набавуваат лекови за домашна аптека секогаш претходно да се направи консултација со лекар или со фармацевт, за да се избегнат нуспојави поради контраиндикација, клиничка интеракција, дуплирање на терапијата или неправилна примена.
Правилното складирање е многу важно, нагласуваат фармацевтите. Некои лекови и откако ќе се отворат важат до истек на рокот наведена на амбалажата, но нивното дејство може да се потврди единствено ако се чувани според препораките. На пример, чепчињата за намалување на телесната температура мора да се чуваат на температура до 25 степени бидејќи лесно се растопуваат и деформираат на температура повисока од телесната температура.
