Во повеќето случаи, лекувањето на своја рака предизвикува повеќе штета отколку добро, предупредува фармацевтот м-р Абас Канани.
“Повеќето луѓе уште при првата појава на симптоми на настинка одат во аптека по лекови. Меѓутоа, тоа е огромна грешка бидејќи нема врска со тоа дали веднаш ќе започнете со лекување или дури кога симптомите ќе станат поинтензивни. Резултатите се исти, настинката едноставно мора да помине сама од себе“, објаснува фармацевтот.
Поточно, поентата е дека лековите не ја лекуваат настинката. Тие само ги ублажуваат симптомите што ги имате.
“Нема голема разлика кога ќе почнете да земате лекови против настинка бидејќи тие немаат никакво влијание на природата на самиот вирус, кој ќе напредува без разлика дали сте го земале или не. Сите тие се само симптоматско олеснување“, вели м-р Канани и додава дека класичната настинка во просек трае до 10 дена.
- Опасна грешка
Уште една од најчестите грешки е употребата на стари антибиотици. Тие, исто така, не можат да помогнат во лекувањето на настинката, а дополнително, опасно може да биде и земањето антибиотици кои сте ги користеле за минати лекувања.
“Повеќето настинки се предизвикани од вируси, а не од бактерии, така што апсолутно нема потреба од земање антибиотици, но некои луѓе сепак одлучуваат да земаат антибиотици кои им останале од порано. Не правете го тоа. Тоа е само настинка, само вирусна инфекција, ќе помине“, објаснува фармацевтот.
Тој предупредува и на недоволно внесување течности.
“Хидрацијата и правилната исхрана се исклучително важни за вашето здравје, а особено се важни кога сте настинати. Дехидрацијата само уште повеќе ќе ве оптовари бидејќи вашето тело мора да работи многу понапорно кога не е хидрирано. Затоа погрижете се да пиете доволно течности. Исто така, внимавајте на внесот на храна бидејќи иако можеби имате послаб апетит кога сте болни, ни случајно не ги прескокнвајте оброците бидејќи така само ќе се чувствувате уште полошо“, вели м-р Канани.
