Проф. д-р Васо Талески, Факултет за медицински науки, Универзитет „Гоце Делчев“ Штип, С. Македонија
FEMS
е федерација на повеќе од 55-членки, мрежа од околу 30.000 микробиолози, основана во 1974 година. Здружението на микробиолози на Македонија е член на FEMS повеќе од 30 години.
FEMS инвестира во науката која ја поддржува микробиологијата и микробиолозите во Европа и низ светот, поврзувајќи микробиолози и споделувајќи знаење преку: Грантови (за организирање на настани и финанасика поддршка на млади истражувачи), Публикации (7 часописи), Настани (Конгреси, Конференции за микробиологија, Летна постдокторска школа, Вебинари), ЕАМ (Европска Академија на Микробиологијата).
Во хотел Метропол во Охрид, од 2-ри до 10-ти септември 2025 се одржува шестата меѓународна постдокторска летна школа со подршка и организација од FEMS
Претходните пет летни школи се одржани во MedILS (медитерански Институт за животни науки) во Сплит, Хрватска.
Основач и Организационен директор на сите 6 постдокторски школи е проф. д-р Васо Талески, од Факултетот за медицински науки, Универзитет „Гоце Делчев“ Штип. Проф. Талески бил Секретар за Грантови на ФЕМС (2006 -2012) и Директор за настани интернационализација (2018 – 2024).
Петтата (во 2024) и шестата (во 2025) постдокторска школа се посветени на климатските промени.
Програмата за Летната школа во 2024 беше фокусирана на: „Климатски промени: “Предизвици и влијание на микробната безбедност на водата и храната”.
Шестата постдокторска школа што е во тек ја надополнува посветеноста и придонесот на ФЕМС за ублажување на проблемите поврзани со климатските промени со фокус на користење на микроорганизми за решавање или ублажување на одредени проблеми на животната средина од аспект на „One health” (интегриран пристап на блиска поврзаност на здравјето луѓето со здравјето на животните, растенијата и заедничката околина).
Предавањата и дискусиите опфаќаат прегледи на современите научни истражувања на микробиомите и нивните функции во различни екосистеми (почва, воздух и вода), и нивни влијанија на здравјето на луѓето, растенијата и животните, како и можностите за разградување и детоксикација на голем број загадувачи и отстранување на одредени гасови.
Учесници се 16 постдоктори (11 од Европа од: Австрија, Велика Британија, Германија, Ерменија, Ирска, Италија, Португалија, Русија, Франција, Шпанија, и 5 вон Европа: Индија, Кина, Костарика, Нов Зеланд и Тунис), и 13 предавачи – ментори (од: Австрија, Велика Британија, Германија, Португалија, САД, Франција, Холандија, Унгарија и Шпанија).
Овој настан е одлична можност за унапредување на знаењата и способностите постдокторите – микробиолози, отварање на нови хоризонти, можности за нови соработки и научни проекти и значајно влијание на нивната научна кариера.
Присуството на странски гости не само што придонесува за продлабочување на соработката, туку и овозможува промоција на културните, историските и природните вредности на Македонија ширум светот.
