Физичката активност во зрелите години го чува менталното здравје и способностите за размислување, посочуваат најновите студии. Постарите луѓе кои биле физички активни, генерално го задржале менталното здравје, дури и ако нивниот мозок покажувал знаци на мали лезии или други симптоми поврзани со Алцхајмеровата болест или друга деменција, открива истражување објавено на онлајн часописот „Неврологија“.
„Физичката активност може да обезбеди когнитивна резерва која помага да се зачува мозокот, дури и ако лицето страда од деменција. Се чини дека стилот на живот игра главна улога во одржувањето на умот и во подоцнежните години“, изјави главниот истражувач д-р Арон Букман.
Студиите покажуваат дека и задржувањето на социјалната и менталната активност кај постарите луѓе, исто така, ги подобрува способностите на мозокот.
„Ова укажува дека поактивен начин на живот кој вклучува физички, когнитивни и социјални активности може да помогне во одржувањето на менталните способности кај постарите луѓе“, вели тој и нагласува дека сè уште не е научно докажано кои фактори директно го штитат мозокот и каков вид вежби се најдобри. За тие одговори се потребни повеќе истражувања.
Досега, во истражувањата беа вклучени 454 постари лица, од кои 191 имале деменција. Тие биле подложени на тестирање на физичките и менталните способности секоја година во текот на 20 години, колку што траело истражувањето. Сите испитаници се согласиле по нивната смрт нивниот мозок да биде истражен, за да се финализира студијата.
Истражувачите откриле дека најактивните пензионери имале подобро размислување и мемориски вештини отколку оние кои биле помалку физички активни. Дури и благо интензивирање на физичката активност помогнало да се намали ризикот од деменција за 31 отсто.
