Флатуленција е надуеност на стомакот со зголемено испуштање гасови, што понекогаш е нормална последица на работата на системот за варење. Сепак, во некои случаи испуштањето гасови и кркорењето во цревата може да укажува на некое пореметување или болест. Може да биде предизвикано и од варење на поедини намирници или од голтање воздух при јадењето.
Кркорењето во цревата и гасовите, во некои случаи пропратени и со пролив можат да бидат последица на некои болести како што се: интолеранцијата на лактоза, малапсорпциски синдром, синдром на иритабилно црево, гастроентеритис, запак, целијакија, Кронова болест, хијатална хернија, колитис, панкреатитис и труење со храна.
Гласната работа на цревата понекогаш е последица и од варењето на некои видови храна, кои предизвикуваат алергии, како и на тешко сварливи шеќери, како што се фруктозата, сорбитол или вештачките засладувачи, како и на користењето на нови лекови, особено лаксативи.
Кркорењето во цревата и гасовите, често ги следи и надуеност на стомакот или дистензија. Најчести причини за надуеност се голтањето воздух, прејадувањето, констипацијата или интолеранцијата на лактоза, како и храна и пијалоци меѓу кои и млечните производи, крушите, јаболката, газираните пијалоци, слатките, брокулата, зелката, гравот, како и масната храна и алкохолот.
Грчевите и гасовите во цревата може да упатуваат и на некој проблем во метаболизирањето на храната како на пример иритабилното црево, Кроновата болест, улцерозниот колитис, дивертикуларна болест, Хеликобактер пилори, целијакија и други.
