Доколку сакате да ги ублажите симптомите на синдромот на иритабилен колон, една од првите работи која треба да ја направите е да ја коригирате исхраната. Во последно време се почесто се зборува за ФОДМАП диетата, која би требало да им помогне на личностите со иритабилен колон со ограничувањето на присуството на ФОДМАП (ферментирачки олигосахариди, дисахариди, моносахариди и полиоли) во исхраната. Станува збор за соединенија од храната кои лошо се апсорбираат во тенкото црево, и под влијае на бактерии доаѓа до нивна ферментација во цревата и како еден од непријатните симптоми се појавува надуеноста.
Некои од намирниците кои се богати со ФОДМАП-и и кои би требало да се ограничат во исхраната се: житарките кои содржат глутен, млекото и млечните производи, овошјето како што се јаболката, крушите, зрелите банани, урмите, сувото овошје, црешите, праските, кајсиите, лубеницата и авокадото; зеленчукот како што се лукот и кромидот, брокулите, зелката, карфиолот; мешунките (грав, соја, леќа, грашок); кокосот, печурките, пивото, газираните пијалаци, вештачките засладувачи и медот.
Од друга страна, исхраната би требало да се базира на намирници со ниска содржина на ФОДМАП-и: месо, риба и јајца, путер, растителни млека, житарки без глутен (ориз, просо, пченка, хељда, овес, киноа), бадеми, лешници, ореви (до 15 парчиња), од овошјето дозволени се портокали, мандарини, лимон, киви, грозје, боровинки, малини, јагоди, банани (додека се уште не се зрели), од зеленчукот може морков, тиквички, блитва, модар патлиџан, компир, тиква, зелена салата, блитва, спанаќ, домат, маслинки. Од напитоците освен негазирана вода можат да се пијат и растителни чаеви (особено чај од нане), црн и зелен чај, кафе, вино (не повеќе од една чаша).
ФОДМАП диетата освен што би требало да помогне при надуеност, помага и кај другите симптоми на иритабилен колон како што се болка во стомакот, мачнина, промени во конзистенцијата на столицата (дијареја VS опстипација), но и замор, летаргија и лоша концентрација.
