Со цел да се подобри квалитетот на животот на пациентите, но и на членовите на нивните семејства, Франција одлучи да изгради село за заболените од Алцхајмерова болест. Селото во југозападниот дел на Франција, во Дакс, ќе има свој супермаркет, медицински центар, фризер, теретана, библиотека, ресторан и фарма, а жителите ќе можат да се движат слободно и ќе им се даваат помалку лекови.
За болните ќе се грижат околу 120 волонтери и 100 членови на медицинскиот персонал, кои ќе бидат облечени во цивилна облека наместо униформи – се со цел, жителите на селото односно пациентите да се чувствуваат попријатно и да живеат посреќно.
„Се надеваме дека пациентите ќе бидат послободни и помалку вознемирени, посреќни. Истото се надеваме дека ќе биде и за медицинскиот персонал. И семејствата ќе бидат поопуштени и ќе чувствуваат помалку вина“, изјавил Франсоа Дирис, претседател на француското друштво на лица со Алцхајмерова болест, пишува „Дејли мејл“.
Изградбата на селото ќе чини 29 милиони евра, а државата ќе финансира поголем дел од овој износ. Цената на ден би требало да биде 66 евра по лице, што е приближно исто како и во обичните домови во кои инаку се сместени болните во Франција. Селото го дизајнирала данската архитектонска фирма НОРД.
