Иако габичните инфекции се почести кај жените, тие можат да се јават и кај мажите, а најчесто за време на незаштитен полов однос со партнерка која има габична инфекција или не се грижи доволно за гениталната хигиена. Но ако вашата партнетка има габична инфекција, тоа не значи дека автоматски и вие ќе се заразите. Долготрајното земање антибиотици го зголемува ризикот од габични инфекции, а мажите и жените со дијабетес или ослабен имунолошки состав (како на пример, кај личности со ХИВ) се почувствителни на инфекции.
Симптоми на габични инфекции кај мажите
Раните симптоми предизвикуваат црвен осип и понекогаш и бели дамки на пенисот. Кожата на пенисот може да биде влажна, а под кожичката или другите набори може да се забележи густ бел исцедок. Црвенило, чешање и болка во пенисот можат да бидат знаци и за други посериозни состојби, вклучително и некои полово преносливи болести. Иако кандидата кај мажите не е опасна, важно е да се појде на уролог.
Знаците и симптомите на габичната инфекција кај мажите вклучуваат:
- Црвенило;
- Црвени точки;
- Сврбеж;
- Исцедок од пенисот;
- Лупење на кожата;
- Чувство на печење за време на мокрењето;
- Бели наслаги.
Мали количества кандида обично се присутни во телото, а влажната околина, недоволната хигиена, неправилната исхрана, стресот, како и претераната консумација на антибиотици, можат да доведат до претерано размножување на кандидата. Поголем ризик за габична инфекција имаат мажите кои не се обрежани затоа што подрачјата под кожата се идеални за размножување на кандида. Ако не се грижите доволно за хигиената, особено после полов однос ризикот за развој на габички е исклучително голем. Габичната инфекцика кај мажите се дијагностицира релативно лесно и понекогаш е доволен само преглед после кој лекарот ќе препише антифунгална крема или маст.
Лекување на габичните инфекции
Најчесто габичната инфекција кај мажите се третира со антифунгални третмани. Препаратите се нанесуваат директно на зафатеното подрачје до два пати дневно, во текот на една недела. Повеќето пациенти кремите или мастите добро ги поднесуваат, без преголеми нуспојави. Ако и вие и партнерката имате симптоми на габична инфекција важно е и двајцата да се подложите на терапија за да не дојде до реинфкеција. Исто така, се препорачува и воздржување од сексуален контакт додека сите симптоми во целост не се повлечат.
Иако габичната инфекција на пенисот не е толку сериозна како болест, сеедно може да резултира со несакани компликации кај мажите како што е ширење на заразата на уретрата, а во некои случаи и до циститис, простатитис, па дури да доведе и до проблеми со плодноста.
Една од можните компликации на габичните инфекции кај мажите е и развој на баланит – односно воспаление на кожичката или главата. Кај болните од дијабетес постои прилично висок ризик од развој на баланит. Ако не се лекува баланитот, може да дојде до создавање на лузни на главата или кожичката. Кожичката може да се спојува со главата, а таа состојба може да биде проследена со силно печење, особено за време на уринирањето. Може да дојде до отекување на лимфните јазли кои стануваат болни на допир, а може да се јават и слабост и умор. Лекувањето на инфекцијата на пенисот досега се покажало успешно и без дополнителни компликации, особено кај мажите кои своите тегоби ги пријавиле на време.
Природно лекување на габичните инфекции:
Во исхраната вклучете храна која негативно делува на кандидата како што се јогурт со жива култура, листест зелен зеленлук, лук и маслиново масло.
- Исфрлете или барем ограничете ја храната која содржи додаден шеќер или рафинирани јаглехидрати.
- Намалете го внесот на храна која содржи природни шеќери, како што се млекото, овошјето и виното.
- Не пијте повеќе од три филџани чај, кафе или газирани напитоци.
- Три пати на ден јадете по три здробени свежи чешниња лук.
- Земајте повеќе намирници кои се богати со витамини Б6 и Б12.
- Секој ден консумирајте по малку јогурт кој содржи живи бактерии.
- Јадете здрава храна богата со железо, магнезиум, селен, цинк и витамини А, Ц и Е.
- Носете памучна, а не синтетичка долна облека.
- Често менувајте ги пешкирите.
- Одбегнувајте парфимирана козметика.
- За време на сексуалниот однос користете лубрикант (ако сте суви) затоа што преголемото триење може да предизвика надразнетост која е погодна за инфекција со кандида.
- Антифунгалното делување на маслото од лаванда, темјан, чајно дрво може да помогне при лекувањето на габични инфекции.
