Научниците од Националниот универзитет во Сингапур успеале со помош на генетски инженеринг да развијат коктел на бактерии и брокула, кој може да ги пронајде и уништи клетките на ракот на дебелото црево. Главниот елемент на овој коктел е облик на бактеријата Escherichia coli Nisslea, безопасна бактерија која е нормален жител на цревата.
Бактериите во овој коктел се генетски модифицирани во пробиотик, кој се врзува за површината на клетките на рак на дебелото црево и лачи ензим за претворање на супстанцијата што се наоѓа во зеленчукот како што е брокулата, во силен антиганцерогеник.
Резултатите од истражувањето покажаа дека повеќе од 95 проценти од тестираните клетки на ракот на дебелото црево биле уништени со помош на овој коктел
За жал, споменатиот коктел на пробиотици и брокула немал никакво влијание на другите видови на клетки на рак, како што се ракот на дојка и ракот на желудник.
На модел на глувци, споменатиот коктел го намалил бројот на клетките на ракот на дебелото црево за 75 проценти.
Се верува дека споменатите пробиотици може да помогнат во превенција на рак на дебелото црево, како и во отстранување на преостанатите клетки на рак на дебелото црево после операција и хемотерапија.
Инаку, ракот на дебелото црево е третиот најчест карцином во светот, чија инциденца е во пораст, пишува „Nature Biomedical Engineering“.
