Гинекомастијата по дефиниција е абнормално зголемување на млечните жлезди кај лица од машкиот пол кое се манифестира со зголемување на ткивото на градите. Овој термин потекнува од грчкиот јазик и во буквален превод значи женски гради, бидејќи на клиничката слика на оваа состојба доминира зголемување на градите и изгледот е сличен на женските гради.
Гинекомастијата може да се појави и во периодот на новороденче, како последица примањето на мајчино млеко кое содржи хормони естроген и прогестерон, но сепак почеста е адолесцентниот период по како резултат на дисбаланс на сексуалните хормони или некое друго метаболичко пореметување или по употреба на одредени лекови со кои се третира некое заболување.
Во денешно време гинекомастијата е најзастапена кај децата кои се патолошки гојазни. Имено, доаѓа до зголемување на ткивото на дојките, односно зголемување пред се на масното ткиво, па и ширење на кожата, при што брадавиците може да бидат вовлечени или испакнати.
Гинекомастијата сепак треба да се одвои од некои други промени на градите кај мажите, како хипертрофија на мускулите по тренинзи или занимавање со бодибилдинг, кога всушност станува збот за само зголемување на мускулната маса на градите, а не липомастија, односно гинекомастија при која хипертрофира масното ткиво.
Оваа состојба ретко е еднострана и во повеќето случаи се појавува со истовремено зголемување и раст на двете дојки.
Гинекомастијата која е вродена, наследна, се појавува по правило од 12. до 18. година, кај околу 40-60% мажи. Секако, најголемиот дел се санира со созревање, вежбање и растењето, односно со нормализирање на хормоналниот статус. Но, во некои случаи таа останува, а лицата се соочуваат со овој не патолошки, но прилично естетски и психички непријатен проблем.
Лицата кои ќе се посомневаат на гинекомастија треба да се консултираат со лекар, кој по прегледот ќе ја утврди дијагнозата, но исто така ќе испита и некои од основните параметри на крвта кои може да упатат и на дополнителни патолошки состојби на организмот, како рак на тестиси, кој во клиничката слика знае да има и гинекомастија. Но, ова не значи дека секој што има гинекомастија има и тумор на тестиси.
