Истражувачите од Универзитетот Вестминстер пронашле врска меѓу зголемениот срцев ритам на луѓето додека гледаат страшни филмови и губењето калории. Научниците под водство на доктор Ричард Мекензи спровеле истражување кое открило дека 90-минутен хорор филм може да има влијание на бројот на потрошени калории, поточно дека луѓето кои гледаат хорор филм согоруваат и до 113 калории – исто количество калории би потрошиле и за 30 минути шетање или 15-ина минути трчање.
Истражувачите ги мереле нивоата на отчукување на срцето, брзината на дишење т.е. издишување на јаглероден диоксид, па откриле дека хорор филмовите кај испитаниците предизвикале забрзан срцев ритам.
„Како што се забрзува пулсот, така крвта побрзо се движи низ телото и тоа доживува бран на адреналин“, објаснил Мекензи, стручњак за клеточен метаболизам и физиологија.
Овој брз налет на адреналин испразнет во кратки моменти на голем стрес (или во овој случај, страв) го намалува апетитот и го зголемува базалниот метаболизам, што резултира со поголемо губење калории. Просечното губење калории по одгледан хорор филм бил 113 калории, но треба да се има предвид дека постојат и некои филмови кои ќе поттикнат уште поголемо согорување, пишува британски Телеграф.
Овие три филма поттикнале најголемо согорување калории кај испитаниците:
- „Shining“ – 184 калории
- „Jaws“ – 161 калорија
- „Exorcist“ – 158 калории
Овие три филма имаат бројни сцени кои кај гледачите поттикнуваат засилен срцев ритам, чиј резултат е поголемо количество адреналин во телото, а со самото тоа и зголемено согорување калории. За оние на кои наведените филмови им се „малку премногу“ секогаш можат да изберат помалку страшни филмови како:
- „Alien“ – 152 калории
- „Saw“ – 133 калории
- „A Nightmare on Elm Street“ – 118 калории
- „Paranormal Activity“ – 111 калории
- „The Blair Witch Project“ – 105 калории
- „Texas Chain Saw Massacre“ – 107 калории
- „Rec“ – 101 калорија
Треба да се има предвид дека ова истражување се темели на бројот на калории што човек може во тоа време да ги согори. Гледањето филмови (за време на чие гледање се губат калории) подразбира одбегнување грицки и слатки пијалаци. И, се разбира, без мижење. Колку повеќе страшни сцени – толку повисок адреналин и повеќе изгубени калории.
