Кога станува збор за миомот, стручњаците тврдат дека нема место за страв. Станува збор за бенигна состојба која е релативно честа во репродуктивниот период кај жената (до менопаузата).
Миомот се карактеризира со неправилен раст на мускулните клетки на матката, кој формира фиброзни јазли во внатрешноста на ткивото на матката, па често се нарекува фибромиом. Тој нема зголемен ризик за појава на рак на матката и речиси никогаш не се развива во малигна творба.
Појавата на миом е најчеста помеѓу 30 и 40 година, а причината не е позната.
Сепак, се знае дека миом не може да се формира во телото на жената се додека организмот не почне да произведува од хормонот естроген. Исто така, евидентно е нагло растење на миомите во бременост, кога практично телото произведува поголема количина на овој хормон. По менопаузата, миомите престануваат да растат, а кај некои жени доаѓа и до нивно намалување (се препоставува поради падот на нивото на естрогенот).
Големината на миомот варира. Некои се со големина на зрно пченка, додека други може да пораснат и до 20 сантиметри.
Миомот е најчесто дијагностициран тумор во женската карлица, како и најчеста причина за хистеректомија (отстранување на матката). Затоа, освен здравствен аспект, миомите со себе носат и психолошка компонента (губење на „чувството на женственост“).
Во екстремни случаи може да пораснат толку, што ја потиснуваат и дијафрагмата и предизвикуваат и негинеколошки пречки во дишењето и работата на цревата. Многу жени, околу 30 % имаат миом во текот на животот. Но голем број жени не знаат ниту дека ги имаат, бидејќи не предизвикуваат симптоми. При случаен наод на гинеколошки или ултразвучен преглед се поставува дијагноза на миом.
Симптоми
За 75 % од жените миомите не даваат никави симптоми. Кај останатите 25 % жени симптомите зависат од бројот, големината и локацијата на миомот. Кај жените со симптоми на оваа болест, тие вклучуваат:
- Обични месечни менструални крварења;
- Долготрен циклус (подолг од една седмица);
- Болка или притисок во карлицата;
- Зачестено мокрење;
- Потешкотии со празнење на мочниот меур;
- Констипација (запек);
- Болки во грбот или нозете.
- Болен сексуален однос.
Сите симптоми бараат посета на гинеколог.
