Откако ќе поминат првите 40 дена од породувањето и кога гостите ќе почнат да доаѓаат речиси секој ќе има по некој „вистински“ совет за вас. И додека гостите се сменуваат еден по еден, после некое време точно ќе знаете кој од посетителите, но и секоја мајка, (не)намерно ќе ве донесат на раб на лудило.
Помагачи кои не помагаат
За време на бременоста сите ви ветуваа помош – од роднини, пријатели, соседи… но реалноста е сосема поинаква. Сите му се воодушевуваат на новиот член и сакаат да го видат, да го подржат в раце… се до оној момент додека не почне да плаче зашто е гладен или не треба да му се смени пелена. Тогаш целата одговорност е повторно ваша, а понудите за помош како да не постоеле.
Посетители кои кај вас дошле на одмор
Многумина нема да имаат разбирање за промената во вашиот живот, ќе продоложат да доаѓаат на гости исчекувајќи го претходното темпо – за да се напијат кафе, да помуабетат, да се подружите при тоа не размислувајќи дека можеби и вие сонувате слободното време, додека малечкото спие, да го поминете спиејќи.
Гости кои доцнат
Ви се најавиле гости. Бебето спие, станот е среден, а и вие изгледате пристојно. Нешто недостасува? Гостите доцнат и влетуваат токму кога бебето се буди, гладно е, треба да се преслече, искапе…
Жени кои мислат дека се што правите е погрешно
Ова се можеби најиритантните типови, ова се мајки (или можеби и уште пострашно, дури и немаат деца, но сметаат дека мора да ја искажат својата мудрост) кои мислат дека нивниот пристап или знаење се најдобри. Секогаш ќе имаат некој коментар и совет плус и ќе сметаат дека некаде грешите. Ах!
Оние кои ви доаѓаат на гости болни
Постојат и луѓе кои не размислуваат за својата здравствена состојба и само неочекувано се појавуваат на врата. Тоа се оние кои не се грижат за малечкото и тоа што се уште нема во целост изграден имун систем, па токму нивната болест (на „совесните“ гости) може да биде опасна за бебето.
Поштар кој секогаш ѕвони два пати
Сите имаме соседи кои умираат од желба да ви го раскажат најновиот трач, кој воопшто не ве интересира, и тоа баш во моментот кога едвај сте го заспале бебето. Или поштар кој „легнува“ на ѕвончето… Резултатот бебе кое цел ден ќе биде раздразливо!
