Менструациите можат да бидат болни, често проследени со грчеви, надуеност, засилена потреба за солена и слатка храна… Ако сето ова ве снајде, имате неколку дена за време на кои се чувствувате навистина јадно. Но кај некои жени овие симптоми траат подолго од самата менструација. Во најголем број случаи гречвите ќе поминат за ден или два по менструацијата, но кај некои жени можат да траат и недела–две после менструацијата, така што жените се навикнуваат на нив и мислат дека циклусот им е „таков“. Но тоа не е вообичаено и таквата состојба не би требало да ја занемарувате.
„Овие симптоми можат да личат и на други состојби и затоа понекогаш се случува жените едноставно да навикнат да живеат со тоа, прифаќајќи ја таквата состојба“, велат гинеколозите.
Проблемот е во тоа што ако симптомите се прифатат како нешто вообичаено, може да се случи некоја посериозна здравствена состојба да не биде откриена на време.
Еве зошто се јавуваат грчеви по менструацијата и што би требало да сторите ако ви се случува тоа:
Како се вика овој тип на болка?
Грчевите во малата карлица кои се предизвикани од што било освен од менструација се викаат секундарна дисменореја. Тоа е органска болест како причина за појава на болни менструации, најчесто ендометриоза, полипи или миоми на матката, стеснување на вратот на матката и негови малформации… Оваа состојба е проследена со разни симптоми, вклучително и болни односи, болки во стомакот и за време на уринирањето, пелвична болка, крвавење или спотинг меѓу менструациите, тешки и обилни крвавења за време на меструацијата, надуеност, умор… се до проблеми со обавувањето на секојдневните активности.
Кои може да се причините?
Секундарната дисменореја може да се јави заради фиброидно ткиво на матката, циста или полипи. Посериозни причини вклучуваат ендометриоза или воспалителна болест на малата карлица.
Ендометриозата е бенигна болест кај жените кај која мали парчиња од ендометриумот, внатрешното ткиво на матката, можат да се најдат надвор од неа, каде што не им е местото. Таму каде што ќе се најдат се однесуваат како ткива на матката, хормонски се зависни и во време на менструацијата крвават како и ендометриумот. Најчесто се јавува во репродуктивната фаза, меѓу 25 и 35 година од животот. Зголемен ризик од појава на ендометриоза имаат жените кои првата менструација ја добиле пред 12 година, чии циклуси се пократки од 27 дена и траат подолго од 7 дена, не користеле контрацепција, го одложиле раѓањето после 30 година, имаат вродени аномалии на половите органи, користат тампони или имаат односи за време на менструација, имаат некој во семејството со ендометриоза. Најчестите симптоми се болни менструации, болки при сексуален однос, пореметување на циклусот во вид на крвавење меѓу менструациите и преобилни крвавења. Често таа е причина за стерилитет.
Воспалителна болест на малата карлица е воспаление на горниот репродуктивен тракт кај жените (матка, јајцеводи и јајници, како и околните органи). До воспаление на малата карлица може да дојде кога инфекцијата се шири од вагината, грлото на матката до матката, јајцеводите и јајниците. Најчести причини се нелекувани бактериски инфекции.
