Немиењето раце после нужда ве става во поголем ризик од ешерихија коли отколку да изедете парче сирово месо, велат резултатите од неодамнешната студија. Научниците велат дека таа најбрзо се шири меѓу луѓето, а не преку сирово пилешко, говедско или свинско месо. Најбрзиот начин да се рашири меѓу луѓето е преку фекални честички кои можат да завршат во вашата уста, односно со немиење раце после вршење нужда.
Бактеријата ешерихија коли живее во цревата на здравите луѓе и животните, а повеќето од нејзините сорти се безопасни по луѓето. Меѓутоа некои можат да доведат до труења со храна, инфекции на уринарните патишта и во најлош случај инфекции на крвотокот.
Инфекцијата со ешерихија може да се случи после контакт со фекалии од луѓе или животни или консумирање контаминирана храна или вода. Симптомите на зараза со ешерихија коли се крвава дијареја, стомачни грчеви, мачнина и повраќање.
Во ретки случаи заболените може да развијат вид на затајување на бубрезите кој се нарекува хемолитички уремичен синдром. Во прашање е состојба во која доаѓа до ненормално уништување на крвните плочки и црвените крвни зрнца кои можат да го запушат бубрежниот систем на филтрирање, што може да биде опасно по животот.
