Губењето килограми на дебелите луѓе, кои воедно патат од мигрена, би можело да им ги олесни главоболките и другите симптоми поврзани со мигрената, покажува едно ново италијаснко истражување.
„Кога личноста ќе загуби на телесна тежина, бројот на денови во месецот со мигрена се намалува, како и болката и траењето на нападите на главоболката“, тврди водачот на истражувањето, доктор Клаудио Пагано.
Тимот на овој лекар прегледал резултати од 10 различни студии, кои вклучувале вкупно 473 пациенти со мигрена. Анализата покажала дека губитокот на тежина е поврзан со големо намалување на зачестеноста, траењето и болката при мигрена. Предностите биле слични, без оглед на тоа дали намалувањето на тежината е постигнато со хируршки зафат или со промени во исхраната и вежбање.
Се наметнува заклучокот – дека ако патите од мигренски главоболки и доколку сте дебели, губитокот на тежина ќе го подобри квалитетот на личниот, семејниот и општествениот живот, како и самата работа и продуктивноста на работа.
Доктор Пагано истакнува дека губењето тежина, исто така, го намалува интензитетот на симптомите поврзани со дебелината, вклучително и дијабетес, хипертензија, болести на срцето, мозочен удар и респираторни болести.
