Научниците истражувале како џвакањето гуми за време на одењето влијае на физичките и физиолошките функции. Во студијата учествувале 46 мажи и жени на возраст меѓу 21 и 69 години, а нивната задача била да одат 15 минути со вообичаено темпо на атлетска патека.
Учесниците биле поделени во две групи – оние од првата група за време на пешачењето џвакале по две гуми за џвакање, додека другата половина добила задача да испие течност во која се наоѓале состојките од гумата за џвакање (без гума базата), во прашање бил прашок растворен во чаша вода. За време на одењето на испитаниците им бил мерен срцевиот ритам, потоа поминатото растојание, брзината на одењето, бројот на чекори и енергетската потрошувачка.
Се покажало дека пулсот на сите учесници кои џвакале гуми за џвакање бил побрз отколку кај другите учесници. Забележано било и дека мажите од првата група, кои биле постари од 40 години, оделе побрзо, па со самото тоа и поминале поголемо растојание и потрошиле повеќе калории. Авторите на студијата се уште не откриле зошто доаѓа до споменатиот ефект кај мажите од оваа старосна група, но се повикале на една претходна студија во која, исто така, било утврдено дека џвакањето гуми за џвакање го забрзува пулсот дури и во состојба на мирување. Овој ефект настапува како резултат на кардио-локомоторна синхронизација, природен феномен со кој срцевиот ритам се ускладува со ритамот на репетитивното движење, во овој случај џвакањето гуми за џвакање. На овој феномен инаку се поподложни постарите лица.
