Терапијата која се изведува во солена соба или халокомора се нарекува халотерапија. Најчесто просторијата е направена од природна камена сол со која се имитира природната пештара или рудник за сол, кои од дамнешни времиња биле препознаени како места кои позитивни влијаат на третирање на некои болести, пред се респираторни или кожни. Денеска е познато дека повремениот престој во солена соба помага и за поттикнување на имунитетот, смирување на невролошкиот систем, за опуштање и спречување на некои болести.
Најчесто халотерапијата се користи заради лечење на хронични тегоби на респираторниот систем како астма, алергии, хронично воспалени синуси, уво, грло, бронхитис како и за дерматолошки проблеми како што се дерматитисот, псоријазата, акните…
Одредени студии потврдуваат дека халотарапијата позитивно влијае на ослободување на дишните патишта од патогени организми, алергени, смог и ситна прашина, кои постојано не опкружуваат, особено луѓето кои живеат во големите градови.
Со престојот во солена соба се вдишуваат најфините микрочестички на камената сол, аеросол, поточно чист натриумов хлорид без адитиви, што позитивно влијае на намалување на воспаленијата и помага за подобра работа на белите дробови. Аеросолите содржат цела палета минерали, богати се со железо, кое е составен дел на хемоглобинот, и пренесува кислород од белите дробови до орханите, спречува анемија и ја поткренува отпорноста на организмот. Богати се и со калциум, кој го одржува нивото на крвниот притисок и е нужен за раст на здрави коски и заби. Содржи и магнезиум, важен минерал за функционирање на локомоторниот, невролошкиот и системот за варење. Бакарот го подобрува метаболизмот, цинкот учествува во процесите како растот и развојот на коските, а присутен е и литиумот, кој спречува склероза, болести на срцето и дијабетесот, како и селенот кој како важен антиоксиданс ги штити клетките и ткивата од слободните радикали и го јакне имунитетот.
