Во желба да се избегне губењето на густината на коските (остеопороза), многу жени земаат додатоци во исхраната збогатени со калциум. Но, што ако во желбата за здравје се претера?
Како што е можно да се страда од недостаток на калциум во телото, така е можно да се дојде и до состојба на негов вишок во организмот. За да се препознаат симптомите на претераното трупање на калциум во организмот, мора да се слушаат и да се следат знаците на телото. Доколку се делува на време може да се спречат сериозни компликации и развој на хиперкалцемија.
Хиперкалцемија означува зголемено ниво на калциум во крвта. Овој минерал е потребен за создавање на коскена маса, а исто така, игра улога во контаркциите на мускулите, отпуштање на хормоните и обезбедува правилно функционирање на мозокот и на нервите. Потешкотии со овие процеси може да се појават при зголемено ниво на калциум.
Освен претераното консумирање на калциум, до оваа состојба пациентот може да дојде и по нагласената активност на паратироидната жлезда, карцином и други болести.
Најчест симптом на премногу калциум е исклучителна летаргија. Некои лица може да не бидат нималку заинтересирани за каков било вид на дневно потребни активности, како на пример, за храна. Исто така, можна е и појава на мачнини, повраќање и дијареа кои може да доведат до дехидрција на организмот и жед.
Меѓу посериозните симптоми на хиперкалцемија спаѓа и неправилниот ритам на отчукување на срцето и многу низок крвен притисок.
Доколку не се обрне внимание на нив, може да се случи лицето да изгуби свест или да се чувствува збунето во поголемиот дел од времето. Кај многу пациенти со вишок на калциум доаѓа до појава на депресија, болки во стомакот и во бубрезите.
Постојаната потреба за одење во тоалет проследена со болка, како и повеќедневниот запек се, исто така, симптоми дека станува збор за нездраво високо ниво на калциум во организмот.
Од овие причини лекарите сугерираат да не се пијат додатоци на исхраната без претходна медицинска консултација, како и советуваат за редовно мерење на нивото на овој клучен минерал за организмот.
