Хипотермијата е итен случај кој се јавува кога телото губи топлина многу побрзо отколку што може да ја надомести, што предизвикува опасно ниска телесна температура. Нормалната телесна температура изнесува околу 37 степени Целзиусови, а хипотермијата се јавува кога температурата на телото ќе падне под 35 степени. Доколку се случи температурата на телото да се намали под 25 степени, шансите за преживување се само 30 отсто. Во случаите на хипотермија, срцето, нервниот систем и другите органи не можат да работат нормално и да функционираат. Ако не се лекува хипотермијата може да доведе до оштетување на срцето и белите дробови, а на крај и до смрт.
Причината за хипотермијата најчесто е поминување долго време на многу ниски температури. Симптоми на блага хипотермија се треперење, вртоглавица, глад, мачнина и забрзано дишење. Исто така на блага хипотермија може да укажуваат и потешкотиите во говорот, мала збунетост, неодстаток на координација и замор.
Личноста која има хипотермија најчесто не е свесна за својата состојба, бидејќи симптомите почнуваат бавно и постепено. Исто така, збунетоста поврзана со хипотермијата ја намалува свесноста и разумното размислување.
Симптомите на тешката хипотермија се исто така треперење, иако како се зголемува хипотермијата треперењето престанува, неспретност и недостаток на координација, отежнат говор и збунетост. Се јавува и поспаност, губење свест, слаб пулс и бавно и плитко дишење.
