Кај жените кои биле подложени на хируршко отстранување на матката или хистеректомија се забележани поголеми шанси за развој на кардиоваскуларни болести, дури и во случаи кога не е направена аднексектомија или отстранување на јајниците, предупредуваат американските истражувачи.
Во статијата објавена во стручното списание „Менопауза“ истражувачите од клиниката Мајо (Минесота) предупредуваат дека ризикот е поголем ако оперaтивниот зафат е направен пред 35-та година од животот на жената.
Истражувачите ја следеле здравствената состојба на над 2 000 жени кои биле подложени на оваа операција. Дваесет години по операцијата, ризикот од зголемен крвен притисок кај нив изнесувал 13 проценти, а од коронарни болести – 30 проценти.
Се покажало дека ризикот кај жени оперирани пред 35-годишна возраст бил уште поголем. Можноста за затајување на срцето кај нив е зголемена за 4,6 пати, можноста за развој на коронарни болести за 2,5 пати, а забележано е и стврднување и стеснување на артериите, во споредба со жените кои не биле подложени на операција.
„Станува збор за најкомплетни податоци досега, кои укажуваат на тоа дека хистеректомијата со себе на долг рок носи ризик од заболување од кардиоваскуларни болести, дури и кога ќе се зачувуваат јајниците“, вели д-р Шенон Лаглин-Томазо, гинеколог од клиниката Мајо.
„Хистеректомијата е втора најчеста голема хируршка процедура која се прави кај жените од целиот свет, а причините се бенигни (нетуморски) и малигни (канцерогени)“, вели докторката.
Во САД секоја година се извршуваат 400 000 хистеректомии, најчесто поради болните бенигни израстоци, фиброиди или миоми на матката, поради неизбалансиран менструален циклус, поради пролапс (спуштање) на матката и поради ендометриоза.
Хируршка процедура се извршува и во случај на појава на карцином на матка или генетска предиспозиција за овој тип на рак.
