На многумина им се чини дека јадењето цвеќе е некој модерен хит кој во кулинарството се појави во изминативе неколку години, но вистината е спротивна: цвеќето во чинија е присутно стотици години, особено во некои за нас егзотични кујни, како азиската. Но и старите Грци и Римјани го користеле цвеќето во исхраната, па може да се каже дека тоа е втемелено во основата на медитеранската кујна.
Бидете внимателни – не секое цвеќе може да се јаде, па препораката е да се консумира само проверено цвеќе, а не да се експериментира, бидејќи цветовите на одредени билки се отровни, како што е примерот со цветот на калата, нарцисот, зумбулот, ирисот и божиќната ѕвезда.
При изборот на цвеќето кое ќе го вклучите во исхраната треба да се водите според овие насоки:
- Бирајте цвеќе кое со сигурност знаете дека може да се консумира.
- Јадете цвеќе кое сами сте го одгледувале или е со проверен квалитет. Цвеќето купено во цвеќарница најчесто е третирано со пестициди и други хемикалии и не е соодветно за исхрана.
- Не јадете цвеќе што ќе го наберете во парк или на улица, бидејќи тоа освен што е најверојатно третирано со пестициди, сигурно е и изложено на загадување.
- Јадете ги само латиците, пред консумирање отстранете ја чашката и толчникот.
- Ако имате проблеми со алергии, во исхраната полека воведувајте го цвеќето и следете ги реакциите, бидејќи некои од нив може да бидат алергени.
Листата на цвеќиња кои можете да ги консумирате, а кои ќе ви ги претставиме во две продолженија, потврдено се здрави и безбедни за јадење.
Алиум: Цветот на билките од фамилијата allium: праз, лук, власец, кромид… се за консумирање и со силен вкус. Цветовите на празот се нежни, а на лукот се силни и доминатни. Сите делови на билките од оваа фамилија се за јадење.
Босилек: Цветовите може да бидат во различни бои, од бели, до розови и виолетови. Цветовите на босилекот по вкус се слични на листовите, но се многу поблаги.
Тиква: Потребно е прво да се отстрани толчникот на цветот. Цветовите се идеални за полнење, а по вкус наликуваат на самиот плод.
Цикорија: Цветовите и пупките се лесно лутникави. Може да се јадат свежи или закиселени.
Цитруси (цвет на портокал, лимон, грејпфрут, лимета): Многу се благи и доминанто ароматични. Бидете умерени со користењето бидејќи може да издоминираат со вкусот над јадењето повеќе од што сакате.
Детелина: Цветовите се слатки со лесно горчлива нота.
Љубичица: Едни од најпопуларните цветови во исхраната. Цветовите се со различни бои и имаат слатка арома со лесно лута нота. Кога цветот ќе се претвори во семе, станува исклучително благо и пикантно. Цветовите може да се полнат, да се додаваат во салата, додека пупките може да се закиселат како капари.
Јасмин: Овие исклучително нежни цветови се чести во чаевите, а ако ги додадете во десерти немојте да претерувате бидејќи нивниот мирис е јак.
