ХПВ најчесто се пренесува за време на вагинален или анален сексуален однос. Кај повеќето личности заразени со хуман папилома вирус никогаш не се развиваат симптоми ниту здравствени тегоби. Во повеќето случаи ХПВ исчезнува сам од себе не предизвикувајќи никакви тегоби.
Меѓутоа кога ХПВ инфекцијата не поминува може да предизвика проблеми како генитални брадавици и рак. ХПВ може да предизвика рак на грлото на матката и други форми, вклучително и рак на вулвата, вагината, пенисот или анусот. Може да предизвика и рак на задниот дел на грлото, вклучувајќи и рак на коренот на јазикот и крајниците (кој се нарекува орофарингеален рак).
Типови на ХПВ
Има две основни категории типови на ХПВ, кои се нарекуваат „нискоризични“ и „високоризични“, зависно од тоа дали кај заразената личност доведуваат до ризик од развој на рак.
Високоризични типови на ХПВ се 16, 18, 31, 33, 45, 52 и 58:
– предизвикуваат приближно 90 % од случаите на рак на грлото на матката кај жените;
– предизвикуваат приближно 90 – 95 % од случаите на рак на анусот кај жените и мажите;
– предизвикуваат приближно 85 % од случаите на рак на вагината;
– предизвикуваат приближно 90 % од случаите на рак на вулвата.
Нискоризични типови на ХПВ се 6 и 11, предизвикуваат приближно 90 % од случаите на генитални брадавици кај жените и мажите.
Генитални брадавици
Гениталните брадавици обично се манифестираат како израстоци во боја на кожа (жолтеникаво–розова до жолтеникаво–кафеава боја), кои можат да бидат издигнати или плочести, мали или големи, а може да се јават одделно или во групи. Кај жените брадавиците можат да растат внатре во вагината, на вулвата или на грлото на матката, заради што и тешко може да се забележат. Кај мажите може да се појават на површината на пенисот или препоните.
Лекувањето на гениталните брадавици може да биде болен процес, а може да вклучува хируршко отстранување, смрзнување или горење на брадавиците. Гениталните брадавици често повторно се јавуваат после лекувањето, особено во првите три месеци.
Рак на грлото на матката
Ракот на грлото на матката обично се јавува во средни години кога многу жени одгледуваат деца и придонесуваат за финансиската стабилност на своето семејство. Овој вид рак е трет најчест облик меѓу жените на возраст од 15 до 44 години.
Рак на вагината
Повеќето случаи на рак на вагината се развиваат во кожата која ја обложува вагината близу грлото на матката. Повеќе од 70 отсто од случаите се бележат кај жени постари од 60 години.
Рак на вулвата
Ракот на вагината е вид рак кој се развива непосредно надвор од вагината, во подрачјето кое се нарекува вулва. Обично овој рак кај младите жени се поврзува со инфекција со високоризични типови на ХПВ.
Рак на анусот
Се развива на подрачјето на анусот, кој е отвор на долниот дел на дебелото црево.
Рак на пенисот
Овој вид рак е редок, а најчесто ги погодува мажите на возраст од 50 до 70 години.
Орофарингеален рак
Повеќето видови рак на главата и вратот се поврзуваат со голема консумација на цигари и алкохол. Меѓутоа, неодамнешната анализа покажала дека 72 % од случаите на инвазивен орофарингеален рак на плочестите клетки се позитивни на ХПВ. Во речиси две третини од примероците испитувачите нашле ХПВ тип 16 и 18.
