При кои промени во вредностите на крвниот притисок треба недоложно да повикате итна медицинска помош? Одговорот на тоа прашање делумно зависи и од тоа каков крвен притисок вообичаено има лицето. Ако нечиј крвен притисок е 95/55 и се чувствува добро, нема причина за загриженост. Ако нечиј крвен притисок се искачил на 160/90 и притоа нема никакви проблеми, потребно е да се прилагоди дозата на лекот, но нема потреба веднаш да се оди на лекар. Сепак, треба да закажете посета на лекар што е можно поскоро.
Сериозни симптоми
Општо земено, треба веднаш да се контактира лекар ако горниот притисок е над 180 или под 90, или ако долниот притисок е повисок од 110 или е понизок од 50 mmHg. Доколку нема други симптоми покрај овие вредности, ситуацијата не е толку загрижувачка, но треба да се реши што е можно поскоро. Доколку се присутни овие вредности и се присутни симптоми како што се вртоглавица, заматен вид, болка во градите, отежнато дишење или главоболка, ова е итна состојба и бара итна медицинска интервенција.
Нагло зголемување
Високиот крвен притисок е хронична состојба која постепено напредува со текот на годините. Но, понекогаш може да скокне толку нагло и сериозно што бара итна медицинска помош. Ако притисокот одеднаш скокнал над 180/120 mmHg, почекајте пет минути, а потоа измерете го повторно. Ако вредностите и понатаму се високи, веднаш повикајте помош.
Хипертензивна криза
Многу високи вредности на крвниот притисок може да значат дека лицето има хипертензивна криза, што може да ги оштети внатрешните органи. Во такви ситуации, високиот крвен притисок може да предизвика губење на меморијата, промени на личноста, прогресивно губење на свеста; мозочен удар; аортна дисекција; болка во градите и срцев удар; ненадејно нарушување на работата на срцето, при што тоа послабо ја пумпа крвта, па течноста се враќа во белите дробови и предизвикува пулмонален едем, ненадејно губење на функцијата на бубрезите; губење на видот; прееклампсија и еклампсија.
