Иако многумина се опоравија од КОВИД-19 и се вратија на нормалниот живот, ново истражување покажува дека околу половина од пациентите кои биле хоспитализирани и по две години чувствуваат барем еден симптом на болеста.
И додека физичката и ментална состојба им се подобрила со тек на времето, хоспитализирани ковид пациенти сепак се со послабо здравје и послаб квалитет на живот од општата популација. Ова посебно се однесува на пациентите кои страдаат од долг КОВИД-19, кои и по две години чувствуваат барем еден симптом – замор, отежнато дишење (краток здив) или потешкотии со спиењето.
Истражувањето објавено во Lancet опфатило 1.192 пациенти во Кина, заразени со SARS-SoV-2 во текот на првата фаза од пандемија од 7. јануари до 29. мај 2020. Тие биле следени првично шест месеци, па една година, па две години.
Резултатите покажале дека на пациентите им се подобрило физичкото и менталното здравје независно од тежината на болеста, но 55 отсто од испитаниците пријавиле дека чувствуваат барем еден симптом по прележаниот КОВИД-19 и две години по инфекцијата, а 68 проценти рекле дека симптомот или симптоми ги чувствувале уште следните шест месеци.
“Независно од тоа колку тешко ги погодила болеста, ковид пациентите почувствувале долгорочно, позитивни здравствени промени и повеќето за тие две години се вратиле на работа. Но, висок е процентот на оние кои ги чувствувале симптомите и ковид пациентите општо имаат послабо здравје од општата популација“, се наведува во студијата.
Резултатите од истражувањето укажуваат дека е потребно и понатаму да се истражува патогензата на долгиот КОВИД-19 и да се развие адекватен одговор.
Истражувањето поврзано со менталното здравје на лицата кои страдаат од долг КОВИД-19, покажува дека 13 проценти од таквите пациенти долго чувтвуваат симтпоми на вознемиеност, а од 11 отсто од нив депресија.
