“Помалку од 30 отсто од заболените од КОВИД-19 кои биле хоспитализирани поради компликации предизвикани со оваа болест во целост се опоравиле една година од почетокот на заразата“, изненадувачки се резултатите од истражувањето за влијанието на долгиот КОВИД-19 на пациентите во Велика Британија.
Тим на научници и лекари од Универзитетот Лестер, меѓу остантото утврдил дека стапката на опоравување по хоспитализацијата е полоша меѓу жените отколку меѓу мажите, а на шансите да на поединци им се подобри здравствената состојба веројатно влијаела и прекумерната телесна тежина.
Меѓу симптомите кои пациентите ги пријавувале една година од почетокот на инфекцијата биле замор, болки во мускулите, лош сон и недостаток на воздух.
„Со оглед на тоа дека во последните две години во Велика Британија поради КОВИД-19 се хоспитализирани повеќе од 750.000 лица, уште сега од нашето истражување е сосема јасно дека последиците од оваа болест ќе бидат големи“, вели Рејчел Еванс, една од главните автори на студијата.
Тимот на научници и лекари истакнува дека резултатите од студијата укажуваат на тоа дека сега постои итна потреба за осмислување на нови начини за борба и спречување на таканаречениот долг КОВИД-19.
“Без ефикасно лекување, долгиот ковид би можел да стане многу распространета долгорочна состојба“, вели проф. Крис Брајтлинг, коавтор на студијата.
Истражувањето, чии резултати се претставени во неделата на Европскиот конгрес за клиничка микробиологија и инфективни болести во Лисабон, опфатило анализа на податоци собрани меѓу над 2.000 пациенти од 39 болници во Британија. Сите се хоспитализирани по инфекција со коронавирус.
Дополнителната проценка на нивната здравствена состојба објавена е пет месеци подоцна, а потоа уште еднаш по една година.
“Утврдивме дека само 25 проценти од пациентите хоспитализирани поради КОВИД-19 во целост се опоравиле пет месеци по излегувањето од болница. Таа бројка само незначително се зголеми – на 29 проценти по една година“, вели д-р Еванс.
“Се работи за прилично лимитирана стапка на опоравување кога е во прашање подобрувањето на менталното здравје на пациените, подобрување на нормалнара функција на органите и квалитетот на живот. Резултатите прилично не изненадија“.
Полоша стапка на опоравување научниците забележале меѓу жените, межу обезните лица и оние кои за време на престојот на лекување во болница биле на механичка вентилација.
“Утврдивме дека е поголема веројатноста од хоспитализација во случај на компликации поврзани со ковид преовладува меѓу машката популација, но тие имаат поголеми шанси да по излегувањето од болница побрзо се опорават. Истражувањето покажа дека жените и обезните лица се посклони кон побавно опоравување една година по зарзата со КОВИД-19“, објаснува д-р Еванс.
Професорката Луис Вејн, една од авторките на студијата вели дека критичен фактор за вака ниската стапка на опоравување бил недостатокот на подолготрајно лекување на болеста.
“Имено, не постојат специфични терапевтски лекови за долготраен ковид, а податоците до кои дојдовме во оваа студија укажуваат на итна потреба за што поефикасни начини на лекување“, потенцира проф. Вејн.
Истражувачите утврдиле дека многу пациенти кои по хоспитализацијата пријавиле дисфункција на органите, страдале од трајно воспаление. “Овие пациенти веројатно добро би реагирале на методите на лекување кои ќе се фокусираат на лекување на воспалението“, додава професорката.
