Апгар-тест е едноставен метод за брза проценка на здравствената состојба на новородено дете веднаш по неговото раѓање. Оценките на Апгар укажуваат на брзината и способноста за прилагодување на новороденчето во надворешни услови на живот.
Кога ќе се роди бебето, медицинскиот персонал ја прави првата проценка на виталноста. Апгар претставува првиот тест на новороденчето што се спроведува веднаш по самото раѓање во родилната сала. Не добиваат сите бебиња секогаш најдобри оценки – овој тест треба да покаже дали на новороденчето веднаш му е потребна некоја медицинска помош.
Тестот е развиен од страна на анестезиологот Вирџинија Апгар во 1952 година, а се спроведува во сите современи болници во целиот свет, при што се проценуваат пет вредности: боја на кожа, дишење, срцева акција, тонус на мускулатурата и рефлексен одговор при дразба. Секој параметар е оценет од 0 до 2, а највисокиот Апгар-скор (Apgar score) е 10.
Почетните букви од критериумите на англиски јазик, го даваат името АПГАР: (Appearance: изглед или боја на кожата, Pulse: пулс, Grimace: гримаса или рефлексна раздразливост, Activity: активност или мускулен тонус, Respiration: респирации, односно дишење)
Евалуацијата се прави во првата минута, а потоа пет минути по раѓањето. Во случај кога резултатите на апгар тестот се ниски се спроведува и во 10. минута или 15. минута. Бебињата кои имаат во проценката апгар над 8 се сметаат за витални, додека новороденчињата со понизок апгар бараат посебен мониторинг на виталните знаци и лекарски надзор, особено во првите 24 часа по раѓањето.
Понекогаш резултатите од првиот тест може да бидат послаби. На пример, ако бебето е родено прерано или со царски рез, понекогаш има пониски од просечните резултати, особено на првиот тест.
АПГАР-ТЕСТ
- Тонус на мускулатурата:
0 – нема движење
1 – ослабен тонус, мала подвижност на рацете и нозете
2 – активно движење
- Срцева акција:
0 – нема отчукувања на срцето
1 – помалку од 100 отчукувања во минута
2 – нормално, над 100 отчукувања во минута
- Рефлексен одговор при дразба:
0 – нема одговор
1 – прави гримаси за време на тестот
2 – гримаси, кивање, кашлање
- Боја на кожата:
0 – бледа или сина
1 – телото розово, а рацете и нозете сини
2 – розова боја на целото тело
- Дишење:
0 – не дише
1 – слаб плач, неправилно дишење
2 – добар, силен плач
