Високиот крвен притисок или хипертензија е состојба што ја има речиси една третина од возрасната популација. Познат е како тивок убиец бидејќи често нема никакви знаци. Иако ова е вообичаена состојба, таа е водечка причина за смрт која може да се спречи. Со избирање на здрав начин на живот, како што се непушење, урамнотежена исхрана, квалитетен сон, физичка активност, можете значително да го намалите ризикот.
Игнорирањето на овој проблем може да доведе до сериозно, па дури и до фатални последици.
“Доколку не се лекува, може да предизвика срцев удар, конгестивно затајување на срцето, мозочен удар, бубрежна болест, губење на видот и сексуална дисфункција“, објаснува д-р Ерик Стал, неинвазивен кардиолог во Универзитетската болница Стејтен Ајленд.
Затоа, се препорачува редовно да се следи. Иако хипертензијата обично не дава предупредувачки знаци, постојат неколку симптоми на кои треба да обрнете внимание.
ШТО ТРЕБА ДА ЗНАЕТЕ ЗА ХИПЕРТЕНЗИЈАТА?
Високи крвен притисок се дефинира кога тој е над 130/80 mm Hg, објаснува д-р Стал.
“Постои мит дека хипертензијата може да предизвика препознатливи симптоми, вклучувајќи потење, вознемиреност, главоболки или црвенило. Некои луѓе наведуваат дека можат да слушнат пулс во ушите или имаат тешкотии со спиењето. Моменталните докази покажуваат дека произведува многу малку видливи симптоми, освен за време на хипертензивна криза кога крвниот притисок изнесува 180/120 mm Hg или повеќе“, вели Шон Маркезе, регистриран медицински техничар во The Mesothelioma Center.
Тој додава дека ако сте свесни дека вашиот крвен притисок е над нормалниот распон и чувствувате нешто ненормално, како што е главоболка или крварење од носот, повеќе од неколку минути, повикајте итна помош што е можно поскоро. Американското здружение за срце препорачува никогаш да не се обидувате сами да дијагностицирате хипертензија. Наместо тоа, разговарајте со лекар кој може да помогне.
КОИ СЕ РИЗИЦИТЕ?
Секако, на секој човек одвреме-навреме му треба проверка на крвниот притисок.
“Меѓутоа, лицата со дијабетес, обезност, хронични бубрежни заболувања, лоша исхрана, седечки начин на живот, пушачите, оние кои консумираат многу алкохол и хипертензија во семејството треба почесто да се проверуваат поради зголемениот ризик“, потенцира д-р Стал.
“Оние кои имале миокарден инфаркт, конгестивно затајување на срцето, хронична бубрежна болест или мозочен удар треба да го следат крвниот притисок. Овие проблеми се резултат на неконтролирана хипертензија и за жал можат да бидат првиот сигнал дека таа присутна“, истакнува д-р Стал.
ВНИМАВАЈТЕ НА РАЗЛИЧНИТЕ СИМПТОМИ
Како што е горе наведено, лицата со овој проблем не мора да чувствуваат никакви симптоми, но може да се појават некои.
“Главоболка, заматен вид, болка во градите, отежнато дишење, крвави дамки во очите и црвенило на лицето се можни знаци и поради нив треба да барате мерење и медицинска помош“, вели д-р Стал.
Еве на кои уште симптоми треба да обрнете внимание:
- Црвени очи
“Субконјуктивалното крварење е медицински термин за пукнати крвни садови во окото, што може да предизвика крвави дамки и општо црвенило. Овој знак обично е почест кај луѓето со дијабетес или циркулаторни нарушувања, но и во некои случаи на хипертензија. Со текот на времето, ако оваа состојба не се лекува, може да го оштети очниот нерв, предизвикувајќи трајно оштетување на видот“, истакнува Маркезе.
- Вртоглавица
Проблемите со крвниот притисок сами по себе не предизвикуваат вртоглавица, но одредени лекови за хипертензија или проблеми со слаба циркулација можат.
“Со текот на времето, оваа состојба може да ги ослаби крвните садови и да го намали протокот на крв во мозокот и другите витални ткива. Кога вашиот мозок добива помалку кислород, може да чувствувате замор, вртоглавица или збунетост. Вртоглавицата е знак и за мозочен удар предизвикан од згрутчување на крвта во мозокот, фатална состојба предизвикана од нетретирана хипертензија“, објаснува Маркезе.
- Срцебиење
Одвреме-навреме на секого му се случува срцебиење, причината може да биде анксиозност, премногу кофеин, но и притисок.
“Срцебиењето може да се чувствува како срцето да ви ‘прескокнува’ или да го чувствувате ‘во грлото’. Овој симптом е поврзан со хипертензивна криза и може да укаже на престоен срцев удар. Исто така, може да доведе до крвни згрутчувања и мозочен удар бидејќи срцето не може ефикасно да пумпа крв за време на хипертензивна криза. Веднаш побарајте лекарска помош ако почувствувате необјасниво срцебиење или абнормална болка во градите“, вели Маркезе.
- Краток здив
Овој симптом може да биде предизвикан и од други состојби, како што се астма и анксиозност, па затоа е важно да се посети лекар.
“ Како што се зголемува крвниот притисок во виталните артерии, може да ја намали ефикасноста на транспортот на кислород додека срцето се бори да ја турка крвта низ белите дробови. Високиот крвен притисок во садовите што ги поврзуваат срцето и белите дробови е познат како пулмонална хипертензија, која може да предизвика отежнато дишење. Пулмоналната хипертензија е критичен проблем и може да предизвика и замор, зашеметеност, болка во градите, кашлица и едем“, објаснува Маркезе.
- Мачнина и повраќање
Ова е симптом на многу инфекции и проблеми, но може да укажува и на проблеми со крвниот притисок.
“Лицата кои земаат лекови за хипертензија може да почувствуваат гадење откако ќе ја пропуштат пропишаната доза, но тоа не мора да значи дека крвниот притисок е висок. Ако можете, измерете го крвниот притисок за време или кратко време по епизодата на гадење и повраќање. Симптомите може да укажуваат на итна хипертензија ако вашиот крвен притисок е над нормалниот опсег и останува таков неколку минути. Во тој случај треба што поскоро да побарате лекарска помош“, заклучува Маркезе.
