Додека трае потрагата по извор на младост, најстариот човек во Норвешка Џорџ Мелфорд Најгард решил да ја сподели тајната за долг и исполнет живот. После смртта на Торбјорн Овребоа, сега Најгард и службено е најстариот маж во Норвешка – на возраст од 107 години. На 12 јануари 2017 година тој го прославил својот 107 роденден во Норвешка, која таа година имала 945 граѓани постари од 100 години.
„Не е точно дека морате да живеете здраво за да живеете долго. Јас јадев и пиев што сакам цел живот. Бев пушач додека не наполнив 40 години, но се уште пијам по една чаша вино секој ден. Виното е добро за крвта, но погрижете се да не пиете премногу“, вели Најгард и додава дека секогаш се труди да биде расположен.
„Човек мора да живее, особено на мои години. Еднаш одамна имав сосед кој секогаш беше лут и нервозен и јас не сакав да бидам таков. Не треба да му бидете лути на животот. Знам дека некој кој е постар од мене умре неодамна, ми кажаа. Но јас не сакам да размислувам за тие работи. Тоа не е добра мисла“, додал Најгард.
Најгард е роден во 1910 година во Северна Дакота, откако татко му емигрирал од Норвешка. Ги преживеал двете светски војни. Зборувајќи за Првата светска војна, Најгард се присетил на некои од своите најрани спомени.
„Се сеќавам на некои епизоди од таа војна, исто така. Меѓу другото, се сеќавам дека татко ми даде еден од нашите коњи за војската, американската војска“, рекол.
Џорџ научил да вози на возраст од 14 години, и возел сиот свој живот додека не наполнил 95, кога почнал да му слабее видот.
Најгард бил сведок и на Втората светска војна, период во кој бил стациониран на Хаваите за време на својата служба во американската морнарица. Се откажал од цигарите во 1953 година, но се уште ужива во својот друг порок – чаша вино.
Најгард и неговата сопруга Адел на крајот решиле да се вратат во Норвешка. Адел починала во 1992 година, на возраст од 101 година после долга и тешка битка со воспаление на белите дробови. После тоа Џорџ бил принуден да се пресели во старечки дома, каде живее се уште. Својот ум се обидува да го држи активен и не посветува внимание на настаните ширум светот.
