Вирусите би можеле да имаат клучна улога во развојот на Алцхајмерова болест, велат резултатите од новата студија. Имено, се покажало дека мозокот на заболените од Алцхајмерова болест содржи високо ниво на два вида на хуман херпес вирус, HHV-6 и HHV-7. Исто така, деталната генетска анализа покажала дека вирусите на херпес се во интеракција со човечките гени, кои претходно биле поврзани со Алцхајмерова болест.
Се смета дека активноста на вирусот ги активира или ги потиснува гените кои се во близок контакт со гените одговорни за Алцхајмерова болест.
Според мислењето на научниците, овие резултати би можеле да ги насочат истражувања за превенција и лекување на Алцхајмеровата болест во нова насока.
Алцхајмеровата болест не е заразна болест, но ако понатамошните студии потврдат дека вирусите или другите инфекции играат улога во развојот на Алцхајмерова болест, тогаш со развојот на нови антивирусни терапии или имунотерапии би можела да се спречи или лекува Алцхајмеровата болест
Инаку, хуман херпес вирусите 6 и 7 (HHV-6 и HHV-7) се широко распространети кај луѓето. Речиси секој човек се заразува со нив во текот на детството, а тесно се поврзани и со roseola infantum, вирусна инфекција кај доенчињата и малите деца, предизвикана од хуман херпес вирус 6 (HHV-6) или, поретко од HHV-7. Roseola infantum се манифестира со висока температура и осип, кој се јавува за време на треската или по нормализација на температурата.
Како и другите херпес вируси, HHV-6 и HHV-7, се присутни во човечкото тело во состојба на мирување и може да се активираат подоцна во животот и да предизвикаат енцефалитис или друга хронична состојба.
Децении наназад голем број на студии укажуваат на потенцијалната улога на бактериите и вирусите во развојот на Алцхајмерова болест, но ниту едно од тие истражувања не објаснило како се поврзани, пишува „Neuron“.
