Експериментална гума за џвакање која што ги “заробува“ честичките на SARS-CoV-2 во плунката се смета за ветувачка за спречување на преносот на нови варијанти на вирусот, според новите податоци, додека истражувачите се подготвуваат да го започнат првото тестирање на луѓе.
Гумата за џвакање содржи копии од протеинот ACE2 кој се наоѓа на површината на клетките, а кој коронавирусот го користи за да влезе и да ги инфицира клетките.
Во експериментите со епрувета со користење на плунка на заразени поединци со варијантите делта и омикрон, честичките на вирусот се закачиле на ACE2 “рецепторите“ во гумата за џвакање и вирусното оптоварување се намалило на нивоа кои што не може да се детектираат, објавија истражувачите во Biomaterials.
Во клиничкото испитување, пациенти со КОВИД-19 секој ден ќе џвакаат четири ACE2 гуми за џвакање во текот на четири дена. ACE2 протеините, “замката на вирусот“ во гума за џвакање се носат во проектирани клетки од зелена салата.
Друга експериментална гума за џвакање направена од грав во прав наместо клетки од зелена салата не само што ги фаќа честичките SARS-CoV-2 во лабораториските експерименти, туку и соевите на грип, други коронавируси кои предизвикуваат обична настинка и потенцијално други орални вируси како што се хуманиот папиломавирус и вирусот на херпес, пренесува Ројтерс.
“Назалниот пренос е занемарлив во споредба со оралниот пренос. Џвакањето ACE2 гума за џвакање и голтањето ACE2 протеин треба да ја минимизира инфекцијата, да ги заштити пациентите со КОВИД-19 и да спречи пренесување“, изјави водачот на истражувањето, д-р Хенри Даниел од Стоматолошкиот факултет на Универзитетот во Пенсилванија.
