Првутот е медицински проблем и мошне непријатна појава, која треба да се лекува. Тоа е состојба која предизвикува чешање, затегнатост и претерано лупење на кожата на главата. Габичките поттикнати од одредени климатски, хормонски промени и стрес побрзо се размножуваат, се собираат на кожата на главата како подрачје со најголема концентрација на лојни жлезди.
Засиленото лачење на лој придонесува за размножување на габичките, а тоа доведува до иритација на кожата и засилено изумирање на кожните клетки, а како резултат на тоа се јавува првут. Се лекува, пред се, со медицински шампон против првут, а во потешки случаи треба да се побара совет од дерматолог.
Внимателно со миењето на косата
Поради заблудите дека личностите кои патат од првут помалку одржуваат лична хигиена, многумина проблемот се обидуваат да го решат така што често ја мијат косата, пречесто, и така дополнително ја влошуваат состојбата.
Доколку долго ве мачи овој проблем и ако е мошне изразен, а не можете да го решите со шампони против првут, најдобро би било да се консултирате со дерматолог, кој ќе ви препорача соодветна терапија.
Она што треба да го знаете е дека само посебните шампони против првут кои содржат антимикотици – за борба против габичките кои ги предизвикуваат, можат долгорочно да го контролираат проблемот.
ВРЕДИ ДА СЕ ОБИДЕТЕ
Природни препарати кои помагаат
Јаболков оцет
Воспоставува здрава пХ рамнотежа на кожата на главата, па е навистина корисен природен лек против првут кој никако не треба да се потценува. После миење косата треба да се измие со вода во која сте додале јаболков оцет во размер 1:1. За мирисот не треба да се грижите бидејќи сосема ќе исчезне штом косата се исуши.
Лосион против првут
Во литар студена вода ставете по 20 г рузмарин, жалфија и мајчина душица. Оставете да отстои три часа за да се растопи. Потоа загрејте, процедете низ чиста газа и ставете ја добиената течност во херметички затворен сад. Лосионот користете го еднаш дневно, и тоа со благо масирање на коренот на косата. Спојката на овие три билки ги убива микробите кои ја напаѓаат кожата на главата, предизвикувајќи нејзино лупење.
Кромид
Кромидот е богат со сулфур и има лековито својство во борбата против габичките кои го поттикнуваат создавањето на првутот. Преполовете главица кромид и со неа истријте го темето. Иако ова можеби и не делува како најпримамливиот рецепт, велат дека е мошне ефикасен, а непријатниот мирис брзо ќе исчезне. Истата постапка може да се спроведе и со лук.
Маска од јајца
Се смета дека и јајцата се добар лек против првут. Изматете две јајца и измешајте ги со вода. Смесата нанесете ја на темето и оставете ја да делува 20 минути. На крајот измијте со ладна вода.
Маслиново масло
На една лажица маслиново масло ставете 10 капки масло од рузмарин. Внимателно нанесете на косата и втријте масирајќи го темето. Потоа ставете капа за капење, и најдобро е да го оставите да делува во текот на ноќта. Наутро измијте ја косата како и вообичаено.
Чај од ловоров лист
Сварете литар вода и во неа додадете една рака иситнет ловоров лист. Кога ќе се излади, процедете и со чајот исплакнете ја косата по миењето. Косата завиткајте ја во пешкир и оставете да делува околу еден час, после тоа измијте со млака вода.
