Нападите на паника се почести отколку што мислите. Тие се проследени со интензивни емоции и физички симптоми како силна и забрзана работа на срце, потење, гадење, вртоглавица.
Тешко е да се спротивставите на такво искуство кое најчесто остава впечаток на беспомошност. Нападите на паника често се придружени со агорафобија и депресија.
Луѓето кои страдаат од паничен напад честопати се чувствуваат осамено, но факт е дека од овој вид на пореметување страдаат милиони луѓе. Постојат многу техники со кои можете да ги олесните нападите на паника, а разговорот и терапијата, кај психолог или психијатар е, секако, еден од најефикасните методи.
Што може сами да преземете и како да си помогнете? Следните 5 едноставни техники ќе ви помогнат да го надминете нападот на паника…
Идентификувајте го нападот на паника навреме
Еден од првите чекори во преземањето на контролата врз паничните напади е да препознаете дека имате напад. Во текот на паничните напади, вообичаено е да се чувствуваат симптоми на срцев или мозочен удар.
Ако ви се случи паничен напад за првпат, најдобро е да побарате медицинска помош за да ги исклучите другите, животни закани. Ако претходно сте доживеале напади, а притоа знаете дека сте целосно здрави, запомнете дека тоа е само минлива фаза.
Таа е непријатна, но не е опасна за здравјето. Животот нема да ви биде засекогаш таков.
Научете техника на дишење
Многумина имаат тешкотии со дишењето кога ќе ги фати напад на паника. За да ги ублажите симптомите, обидете се да се фокусирате на длабоко дишење.
Кислородот што ќе го примите ќе ви помогне да се чувствувате подобро. Ќе го намалите бројот на срцеви отчукувања, ќе го елиминирате гадењето и вртоглавицата. Оваа техника на смирување го менува фокусот и ви дава чувство дека работите ги држите под контрола.
Во текот на паничните напади, вообичаено е да се чувствуваат симптоми на срцев или мозочен удар
Променете го фокусот
Ако сакате да ги надминете симптомите на напад на паника, одберете некој објект на кој ќе му се посветите. Тоа може да бидат вашите чевли или дезен на кошулата која ја носите. Размислете како ќе ги опишете вашите чевли или кошула на некој друг.
Ако сте во бучен или преполн простор, обидете се да пронајдете помирно место, за да може подобро да се фокусирате.
Повторувајте позитивни реченици
За да ги спречите симптомите на напад на паника, концентрирајте се на повторување на фрази кои носат позитивна порака.
На пример, можете да изговарате: „Ова е минлива состојба, имам среќен и исполнет живот!“. Оваа реченица може да ја повторувате во себе, но се препорачува и да ја изговарате на глас.
Опуштете ги мускулите
Ако страдате од напад на паника, сигурно сте забележале дека имате грчеви во мускулите на целото тело, што предизвикува дополнителна непријатност. Фокусирајте се на нивно опуштање.
