За овие намирници се вели дека најдобар вкус имаат оние тиквички кои се долги до 15 см. Освен плодовите се јадат и цветовите, а интересно е дека тие, исто така, се јадат похувани. Спектарот на нутритиенти кои ги обезбедуваат тиквичките е импресивен. Имено, тиквичките се одличен извор на манган и витамин Ц, мошне добар извор на магнезиум, витамин А, калиум, прехранбени влакна, фолна киселина, фосфор, бакар и витамин Б2. Магнезиумот игра важна улога во превенцијата од срцев и мозочен удар, а заедно со калиумот игра улога во регулирањето на крвниот притисок. Антиоксидантите – витамин Ц и бета-каротен спречуваат оксидација на холестеролот и последично го намалуваат ризикот за атеросклероза.
Фолната киселина учествува во регулирањето на нивото на хомоцистеинот, додека пехранбените влакна влијаат на намалувањето на зголемениот холестерол. Имено, и зголеменото ниво на хомоцистеинот и зголеменото ниво на холестерол се добро познати фактори на ризик за развој на болести на срцето.
Овој зеленчук содржи и мошне мало количество калории (17 калории на 100 грама) и како таков се препорачува во диетите за слабеење. Освен тоа, природен диуретик е, па во народната медицина се користи за исфрлање на одвишната течност од организмот, а се верува и дека го намалува холестеролот и ја прочистува крвта, а, исто така, ја подобрува и концентрацијата. Содржи и значителни количества витамин Ц.
Тиквичките благотворно делуваат и на дигестивниот систем. Високиот внес на прехранбени влакна го поттикнува празнењето на цревата, а со самото тоа и отстранување на токсините од организмот.
