Крвавењето од носот е честа појава. Иако може да делува страшно, ретко укажува на некои посериозни здравствени проблеми. Во носот има многу крвни садови кои се мошне нежни, па со самото тоа и лесно прокрвавуваат. Постојат два вида крвавење од носот – антериорно или предно и е почесто во однос на постериорното или задно крвавење, кое се случува во само 10 отсто од случаите. Ова е значително поопасно затоа што крвта може да се спушти до грлото и да создава сериозни проблеми.
Причини
Најчест причинител е сувиот воздух, а климите и централното греење ја исушуваат носната мембрана, односно чувствителното ткиво во носот. Користењето на одредени медикаменти како антихистамини против алергии, настинка или синусни инфекции, исто така, може да ги оштети чувствителни мембрани и да предизвика крвавење од носот.
Други чести причини се:
- заглавување различни предмети во носот;
- хемиски иритации;
- алергиски реакции;
- повреди на носот;
- зачестено кивање;
- чепкање на носот;
- ладен воздух;
- инфекции на респираторниот тракт;
- големи дози аспирин;
- висок крвен притисок;
- пореметувања со крвотокот;
- канцер.
КОГА ТРЕБА ДА СЕ ПОБАРА ЛЕКАРСКА ПОМОШ: Доколку крвавењето трае подолго време, односно подолго од 20 минути состојбата треба да ја сфатите сериозно затоа што веројатно доаѓа од задниот дел од носната преграда.
