Доколку често имате проблеми со варењето, можеби не би било лошо да проверите дали имате зголемен ризик за развој на гастритис. Некои фактори може да ве направат поподложни на тој проблем, а доколку бидете свесни за тоа, поголема е веројатноста дeка нема да ги занемарите симптомите.
Гастритис е воспаление на слузницата на желудникот која претставува заштитна бариера на желудникот, а ако е оштетена или слаба, желудочната киселина почнува да ја нагризува слузокожата на желудникот и предизвикува низа непријатни симптоми, а со тек на време може да предизвика и чир.
Најтипични симптоми за гастритис се болка со печење во горниот дел на стомакот која се влошува или ублажува при јадење, мачнини, повраќање, како и чувство на полн стомак во горниот дел на стомачната шуплина после јадење.
Многу болести и состојби може да го зголемат ризикот за појава на гастритис, вклучувајќи Кронова болест и саркоидоза, состојба при која доаѓа до наталожување на воспалени клетки или грануломи во телото.
Меѓу најчестите ризик фактори за развој на гастритис се:
Бактериска инфекција
Иако инфекцијата со бактеријата хеликобактер пилори е една од најраспространетите, само некои од заразените лица ќе развијат гастритис, или некое друго пореметување во горниот дел на гастроинтестиналниот тракт. Стручњаците сметаат дека чувствителноста на таа бактерија може да биде наследна и дека може да настане како последица од начинот на живење, односно нездрави животни навики, како што се пушење или нездрава исхрана.
Честа употреба на лекови против болки
Вообичаените лекови против болки може да предизвикаат и акутен и хроничен гастритис. Редовното и долготрајно земање на вакви лекови, како земањето на прекумерни количини од нив, за кратко време може во организмот да ја намалат количината на супстанцата која е клучна за зачувување на заштитната обвивка на желудникот.
Прекумерна консумација на алкохол
Алкохолот може да ја надразни, а и да ја нагризе слузницата на желудникот, што го прави почувствителен на делувањето на јаките желудочни сокови. Прекумерното консумирање алкохол почесто предизвикува акутен гастритис, отколку хроничен.
Стрес
Тешкиот физички стрес, на пример по некој хируршки зафат, повреди, или сериозни инфекции, исто така може да предизвика развој на акутен гастритис.
Телото ги напаѓа желудочните клетки
Автоимуниот гастритис се нарекува гастритисот кој се развива кога телото ги напаѓа клетките од кои е составена слузницата. Таа реакција е погубна за заштитната бариера на желудникот, а може да доведе и до развој на гастритис. Овој вид на гастритис е почест кај лицата кои боледуваат од некои други автоимуни болести, вклучувајќи ја Хашимотовата болест или дијабетесот тип 1, но може да биде поврзан и со недостаток на витамин Б 12.
Други болести и состојби
Гастритисот може да биде поврзан и со некои други болести, како што се ХИВ, Кронова болест или инфекии со некои паразити.
