Врз основа на повеќе статистички истражувања се покажало дека дури 8 од 10 личности во текот на својот живот се соочуваат со непријатни болки во грбот, и тоа горниот дел кај лопатките, средниот дел или најчесто во лумбалниот дел. Болките се мошне чести и мошне лесно доаѓа до нарушување на коскената, лигаментната и мускулната структура на грбот.
Главен фактор за појава на болка во грбот е мускулниот дисбаланс
Болките во грбот покрај главоболката се болки кои во текот на животот барем еднаш ги почувствувала секоја личност на овој свет. Најчесто „главен виновник“ за создавањето на овие пореметувања врзани за нашиот ’рбет и грб е мускулниот дисбаланс. Во само 12 отсто од случаите примарните фактори се по потекло од коскеното ткиво. Мускулите се тие кои имаат задача да го носат нашето тело и да му помагаат на ’рбетот низ животот да одиме без болки.
Неактивниот живот, но и неправилното вежбање можат да го загрозат нашиот грб – брзиот начин на живот ги приморува луѓето да не се актвни или да не се доволно активни. Седењето ги ослабува мускулите, а тоа подоцна доведува до структурални пореметувања на грбот. Се разбира, ова се јавува и како резултат на неправилно вежбање.
Удобни обувки и физичка активност како почеток на борбата против болен грб
Најдобар начин да се борите против болките во грбот е превенцијата. Редовно и правилно физичко ангажирање на целиот организам, балансирана сила на мускулите на грбот, рамениот појас, вратот, рацете и нозете придонесуваат за правилен став на телото и ќе ги намалат факторите за создавање на кој било болен синдром на грбот. Бирајте удобни обувки и рекреативно бавете се со некоја физичка активност и нема да имате проблеми или барем ќе ги сведете на минимум.
