Иако месечниот циклус треба да биде редовен, промените се нормална појава кои може да бидат предизвикани од бројни фактори, како стрес, подолго патување, вироза и некои лекови. Но, некои симптоми не смеете да ги игнорирате.
НЕРЕДОВНА МЕНСТРУАЦИЈА
Речиси секоја жена знае колку и трае месечниот циклус: иако како идеален циклус се наведува оној од 28 дена, должината на траењето на циклусот е индивидуална. Циклус кој трае помеѓу 21 и 45 дена, се смета за нормален, и било каква промени во тој период не треба да се сметаат за загрижувачки. Но, ако циклусот ви е пократок од 20 дена или пак паузата помеѓу две менструации е многу голема, таквата информација треба да ја споделите со својот гинеколог.
Една од главните причини за промена е стресот. Оваа болест на денешницата предизвикува нагло паѓање или раст на хормоните, што може да го поремети, односно да го одложи менструалниот циклус. Исто така, ако ваквата нова состојба се повторува од месец во месец, тоа може да биде показател на некои сериозни здравствени проблеми, како болести на штитината жлезда.
СИЛНИ БОЛКИ И ГРЧЕВИ
Менструалните болки се сметаат за нормална појава што ја предизвикиваат хормоналните промени. Тие може да бидат активирани од вирози или болести или пак стресни животни промени. Но, иако грчевите за време на циклусот се многу чести кај повеќето жени, силни и неиздржливи болки не смеат да станат нормална појава поради која секој месец лежите во кревет и пиете лекови против болка, туку за тоа треба да го информирате вашиот гинеколог. Истражувањата забележале дека жените кои патат од многу болни менструации имаат зголемено ниво на простагландин во слузницата на матката, односно ендометриум и во менструалното крварење делувајќи на матката, предизвикува контракција на мускулите и крвните садови.
Освен оваа нормална појава, силните грчеви и болки за време на циклусот, може да бидат предизвикани и од некои промени во организмот, како ендометриоза, воспаление, стеснување на каналите на матката, миом и големи цисти на јајчниците.
ОБИЛНА МЕНСТРУАЦИЈА
Како и должината на циклусот, траењето и нивото на крварење се многу индивидуални кај жените. Нормално крварење се смета она кое трае помеѓу два и седум дена, а силата на крварењето треба да биде таква, да без проблем може да впие поголема влошка, односно три до шест тампони во еден ден.
Но, ако менструацијата стане толку обилна да не може да ја контролирате со хигиенски помагала (над 80мл дневно), треба да се обратите на гинеколог. Дури половина од обилните менструации се предизвикани од промени како што се полицистични јајчници, миоми, аденомиоза и полипи, но и од некои од сериозните болести како карцином на цервиксот или тумор кои лачат естроген.
