Магнезиумот е еден од клучните минерали во нашиот организам, вклучен во повеќе од 300 разни ензимски реакции. Современата исхрана, меѓутоа, не обезбедува доволно магнезиум, па затоа, се проценува дека половина од популацијата не внесува доволно од овој минерал. Хронично ниското ниво на магнезиум во крвта води до зголемен ризик за покачување на крвниот притисок, дијабетес тип 2, проблеми со метаболизмот, а во некои случаи дури и до застој на работата на срцето.
Без прецизни лабораториски мерења, не може точно да се знае дали имаме доволно магнезиум или не во организмот, но еве неколку показатели кои може да укажат дали би требало во исхраната да внесете намирници богати со магнезиум, односно дали ви недостасува магнезиум.
Проблеми со спиење: Магнезиумот влијае на мозокот, го зголемува лачењето на невротрансмитерот гама аминобутеринска киселина, која игра клучна улога во регулирањето на сонот. Едно клиничко истражување на возрасни лица заклучило дека зголемениот внес на магнезиум го подобрува квалитетот на сон кај испитаниците.
Склоност кон депресија: Недостатокот на магнезиум може да доведе до тоа да се влошат нападите на депресија кај лицата кои веќе се склони кон неа, до намалување на енергијата, вознемиреност и надразнетост.
Имате мигрена: Лицата со ниско ниво на магнезиум во организмот се склони кон главоболки. Клиничко истражување покажало дека лицата кои редовно консумирале магнезиум ја намалиле честотата на напади на мигрена за 41 % во однос на оние кои не го внесувале овој минерал.
Изморени сте: Магнезиумот помага при природното производство на енергија во организмот. Ако немате доволно од него, пореметено е производството на аденозин-трифосфат, кој е неопходен за создавање на енергија.
Имате тахикардија: Прескокнувањето на срцето може да биде знак дека сте ги испразниле резервите на магнезиум. Во тој случај, аритмијата (неправилен пулс) претставува вообичаен индикатор. Таа состојба треба да се сфати сериозно и да се консултира лекар, дури и ако станува збор само за недостаток на магнезиум.
Имате грчеви во мускулите: Калциумот и магнезиумот заедно ги регулираат контракциите на мускулите. Дури и малку намаленото ниво на магнезиум во организмот доведува до тоа да премногу калциум се врзува со мускулите, што доведува до проблеми со контракции на мускулите и тоа може да доведе до појава на грчеви во нозете и вкочанетост.
Ви излегуваат акни: Магнезиумот е минерал кој го намалува воспалението на кожата и долго време бил користен како терапија за кожни пореметувања. Значи, евентуалните воспалија може да бидат знак за недостаток на магнезиум.
