За прв пат во Македонија почнува имунизација против грип со нова, четиривалентна вакцина. Станува збор за заштита од четири видови на инфлуенца. До сега, вакцините против грип беа тривалентни, што значи дека заштитувале од три вида на грипа: два од типот А и еден од тип Б.
Она што е важно е дека со оваа вакцина за прв пат безбедно можат да се вакцинираат деца од 6-месечна возраст и трудници.
Годинава вакцините против сезонскиот грип се бесплатни за лицата над 65 години со просечна и потпросечна пензија, како и за оние кои не добиваат пензија. Според стручњаците оваа вакцина претставува одлична превентивна заштитна мерка против грип, особено за повозрасните лица, хронично болните, здравствените работници, лицата со кардиоваскуларни и респираторни заболувања, како и воопшто за лица со намален имунитет.
Министерството за здравство за прв пат набавува 28.000 дози на висококвалитетни вакцини против грип од реномирани производители.
Во таа насока, вчера, во Француската Амбасада во Република Македонија, во присуство на медицинската јавност се одржа медицинска конференција за важноста на имунизацијата и улогата на вакцините. На неa беше презентирана платформата за едукација на населението под име „Заштита од грип, важноста на имунизацијата и улогата на вакцините”.
На настанот бeа презентирани податоците од Европскиот центар за превенција и контрола на болести и Европската комисија кои покажуваат дека грипот може да убие повеќе луѓе отколку сообраќајни незгоди. Тој е одговорен за 70.000 смртни случаи годишно во Европската Унија, од кои 90% се на возраст над 65 години, луѓе главно со придружни хронични болести.
“Последниве години, двата вида грип од типот Б, биле присутни со различен интензитет во различни периоди од годината и во различни земји. Варијабилноста и непредвидливоста на двата вида грип од типот Б, предизвикаа да биде исклучително тешко за Светската здравствена организација да одлучи за кој грип од типот Б ќе се препорачува тривалентната вакцина. Затоа оваа година СЗО препорачува употреба на четиривалентни вакцини против грип, а секако притоа треба да се пофали и македонската влада за почитување и усогласување со препораките на СЗО“, истакнаа експертите на конференцијата.
Вакцинацијата против грип е најефективниот начин за спречување на болеста и нејзините тешки форми, а кои можат да доведат и до хоспитализација и смрт. Покрај тоа, грипот, има сериозни социо-економски последици и предизвикува трошоци и за здравствениот систем и за секој граѓанин поединечно. Имунизацијата е препорачлива посебно за ризичните групи во кои влегуваат: возрасни над 65 години, деца над 6 месеци, бремени жени, медицински професионалци и оние кои страдаат од хронични заболувања на респираторните и кардиоваскуларните системи, дијабетес и други метаболитички болести. Во некои земји од ЕУ, како Холандија и Велика Британија, покриеноста со вакцинацијата против грип кај ризичните групи достигнува до 75%. Заразните болести се главната причина за смрт, дури и во најразвиените земји. Според Светската Здравствена Организација со вакцинацијата се зголемува имунитетот и се заштитуваат над три милиони луѓе годишно низ целиот свет.
А. Стојановска
