Бројот на заразени со коронавирусот се зголемува, интересот за вакцинација тече непречено, со вообичаена динамика. Според последните податоци на Министерството за здравство, завчера се вакцинирани 13.232 лица. Досега се аплицирани вкупно 1.326.584 дози вакцини, а ревакцинирани се 589.573 лица.
Наскоро би требало да се почне и со довакцинирање со трета доза, а што вели струката по ова прашање. Дали е поефикасно да се почне со примање трета доза или да се истрае со вакцинирањето на потребниот број граѓани, со една, односно со две дози вакцина против коронавирусот.
Познатиот хрватски имунолог, Златко Тробоњача вели:
“За трета доза почна да се зборува кога во некои земји кои имаат многу висок процент на вакцинираност на населението е забележано дека епидемијата се реактивира. Причината е појавата на делта сојот, кој од една страна, е високо заразен сој, односно стравично се реплицира во организмот на инфираниот, а од друга страна, донекаде е имуноевазивен, околу можеби 20 проценти, и од трета страна, се покажа дека лица кои се вакцинирани пред шест месеци или порано, губат антитела, што на крајот го пореметуваат балансот помеѓу самиот вирус во телото на инфицираниот и концентрацијата на антитела, поради што може да се инфицира“, објаснува експертот.
Дали е време за трета доза, д-р Тробоњача смета дека се додека не се постигне саканиот процент на вакцинирани со втора доза, ова прашање е дискутабилно.
“Секако, држам до тоа дека треба да се вакцинираат оние кои се хронично болни, оние кои се имуносупримирани, кои боледуваат од некои метаболни, кардиоваскуларни болести, потешки болести, малигни заболувања. А, што се однесува до општата популација се држам до тоа да бидат лица над 60 години, но дека на сите треба да им се понуди трета доза, па кој сака да прифати да се вакцинира“, нагласува имунологот.
Прво сепак би требало да се доврши вакцинацијата со прва доза, бидејќи, како што потсетува тој, се покажа дека “две дози вакцина добро штитат, ако не од инфекција и пренесување на болеста, барем од потешки форми на болеста и хоспитализација“. Најдобар пример е САД, додава тој, каде во северните држави е исклучително мал процентот на хоспитализации, а во јужните каде вакцинираноста е многу помала, далеку е поголем бројот на болнички згрижени лица со КОВИД-19.
