Имунологот проф. д-р Борислав Каменов објаснува како изгледаат здравствените проблеми кај луѓето по борбата со КОВИД-19. Тој вели дека пациентите кои се опоравиле, односно го прележале коронавирусот SARS-CoV-2 може да имаат симптоми како краток здив, лесно заморување, промени на кожата, но и бројни непознати знаци.
“Кога поединец ќе се зарази со коронавирусот, имуниот систем ќе ја одигра најважната улога. Пациентот поминува без последици ако има добар одговор на организмот, но доколку имаме хроничен болен, лице со веќе нарушено здравје, проблемите може да се јават во друг правец. Симптомите се влошуваат токму од причина што за време на борбата со КОВИД-19, имуниот систем дополнително ослабел“, вели проф. д-р Каменов.
Приказната, потенцира професорот, не се завршува со негативен тест, освен кај оние кои пред заболувањето воделе сметка за здравјето и го корегирале имунитетот.
“За време на борбата на организмот, имуниот систен слабее, значи прво што мора да направите по прележаниот коронавирус е да го зајакнете. Не е се готово со негативниот тест. Може да се јават проблеми со белите дробови, проблеми кои не се до крај санирани, краток здив, кашлица, алергиски реакции и друго. Ова нема да се случи кај лица кои имаат добар имун одговор, тие ќе се заразат и ќе поминат со полесни симптоми, па дури и ако се асимптоматски пациенти“, вели д-р Каменов.
“Проблемите се јавуваат кај оние пациенти со придружни болести, дијабетичари и хронични болни. Подвлекувам и опоменувам, по прележаниот коронавирус мора да ја проверите состојбата со имуниот систем, што вирусот има пореметно, а потоа да се фокусирате на причината, со паралелно лекување на последиците. Значи, не треба само да се бара доза инсулин, туку и причините зошто е така. Некои пациенти имаат проблеми со мокрењето, некои со срцето, значи вирусот може да поремети многу работи. Одговорот повторно мора да се бара во поправање на грешките во имуниот систем“, објаснува лекарот.
