Зголемената телесна температура и сувата кашлица беа евидентирани како први симптоми на КОВИД-19, за да подоцна се утврди дека голем процент од инфицираните пациенти го губат и осетот за мирис и вкус. Овој симптом сега е еден од водечките знаци за новиот коронавирус, а научниците спровеле студија за детално да ја истражат аносмијата кај заболените.
Истражувањето на научниците од Индија дало целосно нови и многу важни резултати, бидејќи е утврдено дека заразените лица најчесто не можат да почувствуваат многу одредени мириси.
За таа цел, експертите користеле пет различни типови на мириси за да направат тест за мирис, а овие пет биле избрани врз основа на анкета во која бил направен попис на 30 ароми, претставен од 100 лица кои ги избрале оние кои можат најлесно да се препознаат.
На крајот биле издвоени пет мириси за тестирање – лук, нане, кардамом, кокосово масло и анасон.
За потребите на студијата, 49 асимптоматски пациенти со коронавирус и 35 лица кои немале КОВИД-19 требало да ги препознаат тие мириси. Истражувачите утврдиле дека оние кои се заразени со SARS-CoV-2 навистина го губат осетот за мирис, но не целосно. Попрецизно, само 4,1% од учесниците не успеале да препознаат ниту еден од петте мириси, 38,8% не можеле да идентификуваат барем една од аромите, а 16% не можеле да препознаат две ароми.
Здравите учесници можеле да ги почувствуваат сите мириси, но 14% од нив не умееле правилно да идентификуваат најмалку една арома.
Кога ги анализирале резултатите од студијата, научниците дошле до заклучок дека пациентите кои се заразени со новиот коронавирус најчесто не можеле да почувствуваат два мириса – кокосово масло и нане. Затоа веруваат дека овој тест на ароми може да помогне во идентификување на асимптоматските пациенти.
